(વર્તમાન પ્રવાહ ન્યુઝ નેટવર્ક)
ચીખલી (વંકાલ), તા.03: વાંસદા તાલુકાના સિણધઈ રાજમલા ગામે શુક્રવારની સવારના સમયે ખેત મજૂરો ખેતી કામ કરી રહ્યા હતા. દરમ્યાન ખેતરમાં સંતાઈ રહેલ દીપડાએ એકા એક બે મજૂર ઉપર હુમલો કરતા નાસ ભાગ મચી જવા પામી હતી. ધોળા દિવસે બે ખેત મજૂર પર દીપડાએ હુમલો કરતા સ્થાનિકોમાં ફફડાટ વ્યાપી જવા પામ્યો હતો.
છેલ્લા કેટલાક સમયથી દીપડો અવાર નવાર જિલ્લામાં રાત્રીના સમયે કે દિવસ દરમ્યાન લટાર મારતાં હોવાનો વીડિયો સોશ્યલ મીડિયામાં વાયરલ થઈ રહ્યા છે. ત્યારે શુક્રવારની સવારના સમયે વાંસદાનાં સિણધઈ ગામે ખેત મજૂરો પર હુમલાની ઘટનાને લઈ સ્થાનિકોમાં ભયનો માહોલ જોવા મળી રહ્યો છે. ગામમાં કે ઘરમાં ઘુસી પશુ મારણ કરનાર દીપડો હવે ધોળે દિવસે પણ શિકારની શોધમાં નીકળી આવતાં લોકોમાંભયનો માહોલ સર્જાયો હતો. જોકે ઘટનાને પગલે વન વિભાગ દ્વારા જરૂરી સર્વે કરી પાંજરું ગોઠવવાની તજવીજ હાથ ધરી હતી.