રાત્રિના સમયે સામી હેડલાઈટના પ્રકાશમાં વાહન ચાલક
ગટરમાં ખાબકી જવા ભીતી
(વર્તમાન પ્રવાહ વાપી બ્યુરો)
વાપી, તા.03: વાપી છરવાડા હાઈવે સર્વિસ માર્ગની નજીક પાકી ગટર લાઈન બનાવાયેલ તેની પાસેથી નાનકડી ખનગી સમાંતર પસાર થાય છે. આ ખનકી વાહન ચાલકો માટે જોખમી સાબિત થઈ રહી હોવાથી અહીં સેફટી દિવાલ જાહેર સલામતિ માટે બનાવવી જરૂરી છે તેવી માગ ઉઠવા પામી છે.
વાપી બલીઠા પુલથી લઈ વૈશાલી ચાર રસ્તા સુધી બન્ને તરફ હાઈવે સર્વિસ રોડ આવેલ છે. આ બન્ને સર્વિસ રોડ હંમેશા ટ્રાફિક વ્યક્ત રહે છે. બલીઠા તરફ જતા સર્વિસ રોડ ઉપર નવા છરવાડા ક્રોસિંગ નજીક મોટી પાકી ગટર અને ખનકી વહે છે. આ જગ્યાએ સેફટી વોલ બનાવવાની જરૂરી છે. થોડા દિવસ પહેલાં એક ટ્રક આખી ખનકીમાં પલટી મારી ગઈ હતી. આ ગંભીર અકસ્માતનિવારવા સેફટી વોલ બનાવવી જરૂરી બની છે. બીજુ રાત્રિના સમયે સામેના વાહનની હેડલાઈટમાં નાના વાહન ચાલક અંજાઈ જતો હોય છે ત્યારે ખનકીમાં પટકાઈ શકે છે તેથી જાહેર સલામતિ હેતુ અહીં સેફટી વોલ બનાવવાની માગ ઉઠી છે.