રોપણીનું કામકાજ પતાવ્યાના આનંદમાં આદિવાસીઓ દિવાસાની પરંપરાગત ઉજવણી કરે છે
(વર્તમાન પ્રવાહ વાપી બ્યુરો)
વાપી, તા.28
ધરમપુર તાલુકા વિસ્તારમાં અષાઢી અમાસ એટલે દિવાસાની ઉજવણી આદિવાસીઓ દ્વારા પરંપરાગત રીતે કરવામાં આવે છે. આજે ગુરૂવારે ધરમપુરમાં નારિયેળ ટપ્પા દાવની રમત સાથે હજારો આદિવાસીઓએ દિવાસાની ઉજવણી કરી હતી.
ધરમપુર અને કપરાડા તાલુકો પહેલાં એક હતો. 238 જેટલા ગામોમાં મોટાભાગે આદિવાસીઓનો બહુધા વસવાટ છે. આદિવાસીઓના અનેક તહેવાર-પર્વ તેમની પરંપરા સંસ્કૃતિ દ્વારા ઉજવવામાં આવે છે તે અંતર્ગત આજે દિવાસાનો તહેવાર પણ રાજાશાહીથી ચાલતી આવેલી પરંપરા મુજબ ઉજવણી કર્યો હતો. ધરમપુરના સમડીચોક બજાર વિસ્તારમાં નારિયેળ ટપ્પાની રમત રમી આદિવાસીઓ દિવાસાની ઉજવણી કરી હતી. એકબીજાના હાથમાં નારિયેળ પકડી પછી ફોડવામાં આવે- જેનું નારિયેળ ફૂટી જાય તે સામેવાળાના નારિયેળ આપી દેવું પડે. આ રમતનો મહિમા યથાવત આજે પણ જળવાઈ રહ્યો છે. ચોમાસાની રોપણી કાર્ય પુર થયાના આનંદમાં દિવાસાની ઉજવણી આદિવાસીઓ કરતા હોય છે.
