રીક્ષા ચાલક રૂપેશ મંડલ અને સ્ટંટ કરનાર દુર્ગેશ મંડલની સામેકાર્યવાહી કરવામાં આવી
(વર્તમાન પ્રવાહ વાપી બ્યુરો)
વાપી, તા.25: વાપીમાં રીલ બનાવવાની ઘેલછામાં આજકાલ ચાલુ વાહનમાં સ્ટંટ કરવાના કિસ્સા વધી રહ્યા છે તેવો વધુ એક બનાવ વાપી જીઆઈડીસી થર્ડ ફેઝ રોડ ઉપર એક રીક્ષામાં લટકી જોખમી રીતે અકસ્માત સર્જાય તેવો સ્ટંટ કરવા જતા રીક્ષા ચાલક અને સ્ટંટ કરનાર બન્ને યુવાનો પોલીસને અડફેટે ચઢતા બન્નેની અટકાયત કરી પોલીસે કાર્યવાહી કરી હતી.
વાપી ઉદ્યોગનગર પોલીસ સ્ટેશનના જવાન સર્જનસિંહ કિરણસિંહ અને જયવિરસિંહ અસવાર ગુરૂવારે રાત્રે થર્ડફેઈઝ રોડ ઉપર પેટ્રોલીંગ કરી રહ્યા હતા તે દરમિયાન મુખ્ય રોડ ઉપર પાણીની ટાંકી નજીક રીક્ષા નં.જીજે 15 એડબલ્યુ 2859 માં એક યુવાન બેફામ ચાલતી રીક્ષામાં બહાર લટકી જોખમી સ્ટંટ કરતો જોવા મળ્યો હતો. બન્ને પોલીસ જવાનોએ રીક્ષાને અટકાવી હતી. રીક્ષા ચાલક રૂપેશ મોહન મંડલ અને સ્ટંટ કરનાર દુર્ગેશ કણી મંડલ બન્ને રહે.કોચરવા વડીયાવાડ મૂળ રહે.બિહારની અટકાયત કરી હતી. જાહેરમાં લોકોની જીંદગી જોખમમાં મુકવા બદલ ગુનો નોંધી વધુ આગળની તપાસ પોલીસે હાથ ધરી હતી. અટકાયત બાદ બન્ને આરોપી પડી ભાંગ્યા હતા અને પોલીસ સમક્ષ માફી માગી હતી.
