એક સાથે આટલા બધા સાપ એક જ સ્થળે જોવા મળતા લોકો ભયભીત બન્યા
(વર્તમાન પ્રવાહ વાપી બ્યુરો)
વાપી, તા.07: વાપી સહિત આજુબાજુના વિસ્તારોમાં હમણાં વરસી રહેલા એકધારા વરસાદને લઈ અનેક જગ્યાએ ઝેરી-બિનઝેરી સાપો બહાર નિકળેલા ઠેર ઠેર જોવા મળી રહ્યા છે. આજે ગુરૂવારે વાપી બિઝનેશ પાર્ક નજીક માદા વાઈપર સાપ સાથે 30 જેટલા વાઈપર સાપના બચ્ચા એક જ સ્થળે નિકળેલા જોવા મળ્યા હતા. તમામ સાપોનું તાબડતોડ રેસ્ક્યુ કરીને સુરક્ષિત રીતે જંગલમાં છોડી દેવાયા હતા.
વાપી વાઈબ્રન્ટ વિઝનેશ પાર્ક નજીક છેલ્લા કેટલાક દિવસોથી સાપના બચ્ચા ફરતા જોવા વારંવાર મળી રહ્યા હતા તેવી ફરિયાદો રેસ્ક્યુ ઈમરજન્સી ટીમ ભિલાડને મળતી હતી. આજરોજ બેટર હાઉસ ફર્નિચરની પાસે ચેમ્બરમાં સાપો ફસાયેલા જોવા મળતા ભિલાડ રેસ્ક્યુ ટીમને જાણ કરવામાં આવતા વર્ધમાન શાહ અને જીતેન્દ્ર ધોડી ઘટના સ્થળે દોડી આવ્યા હતા અને ચેમ્બરમાં પડેલા સાપને જોયા હતા. અત્યંત ઝેરી રસલ વાઈપર સાપ પણ હતો. પાણીમાં ફસાયેલા તમામ સાપોને ધીરે ધીરે રેસ્ક્યુ કરાયા હતા. માદા ઝેરી વાઈપરઅને બચ્ચાંને રેસ્ક્યુ કરી સુરક્ષિત જંગલમાં છોડી દેવાયા હતા.
