40 શેડ વિસ્તાર સ્થિત અનુપ પેઈન્ટ્સ કંપનીમાં લાગેલી ભિષણ આગમાં ચાર જેટલા બ્લાસ્ટ થયા : મેજર કોલ જાહેર: ફાયર ફાઈટરો ભારે જહેમત બાદ આગને કાબુમાં લીધી
(વર્તમાન પ્રવાહ વાપી બ્યુરો)
વાપી, તા.17: વાપી જીઆઈડીસી વસાહતમાં ચિંતાજનક આગના બનાવો વધી રહ્યા છે. તેવો વધુ એક બનાવ આજે મંગળવારે બપોરે ફોર્ટી શેડમાં આવેલી એક કંપનીમાં ભિષણ આગ લાગી હતી. આગ એટલી ભયાનક હતી કે ચારે તરફ અફરા તફરીનો માહોલ છવાઈ ગયો હતો.
વાપી જીઆઈડીસી થર્ડફેઝ રોડ ફોર્ટીશેડમાં આવેલ અનુપ પેઈન્ટ નામની કંપનીમાં બપોરે ભિષણ આગ લાગી હતી. આગની જ્વાળાઓ અને ગોટાઓથી આકાશ ભરાઈ ગયું હતું. ભિષણ આગને લઈ ચાર જેટલા બ્લાસ્ટ પણ કંપનીમાં થતા આજુબાજુની કંપનીઓ પણ ભયભીત બની હતી.આગની જાણ સ્થાનિક તમામ ફાયરોને કરવામાં આવતા ઘટના સ્થળે છ જેટલા ફાયર ફાયટરોએ આગ બુઝાવવાની જહેમત શરૂ કરી દીધી હતી. કંપનીનો મુખ્ય રો-મટેરીયલ સોલવન્ટ હોવાથી સોલવન્ટના જથ્થાને લઈ આગ વધુ બેકાબુ બની ફેલાતી રહી હતી. જો કે આગમાં કોઈ જાનહાની થવા પામી નથી. આગ લાગવાનું કારણ અકબંધ છે. આગની ભયાનકતા લઈ મેજર કોલ જાહેર કરાયો હતો.
