નવા બિરાજમાન થયેલ રાષ્ટ્રપતિ દ્રૌપદી મુર્મુને કોંગ્રેસ સાંસદ અધીર રંજને રાષ્ટ્રપતિના બદલે રાષ્ટ્રપત્નીની ટિપ્પણી વિરૂધ્ધ ભાજપ દ્વારા વિરોધ પ્રદર્શન કરાયું
(વર્તમાન પ્રવાહ વાપી બ્યુરો)
વાપી, તા.28
હાલમાં બિરાજમાન થયેલ મહામહિમ રાષ્ટ્રપતિ દ્રૌપદી મુર્મુ માટે કોંગ્રેસના સાંસદ અધીર રંજને રાષ્ટ્રપતિની જગ્યાએ રાષ્ટ્રપત્નની ટિપ્પણી કરતા ભાજપમાં મામલો બિચકાયો હતો. જેના પ્રત્યાઘાત આજે ગુરૂવારે દેશભરમાં પડયા હતા. ઠેર-ઠેર ભાજપના કાર્યકરોએ સાંસદ અધીર રંજનના પૂતળા બાળી સોનિયા ગાંધી હાય હાય ના નારાઓ ગાજ્યા હતા. જે અંતર્ગત વલસાડ જિલ્લાના શહેરોમાં અધીર રંજનના પુતળા દહનના કાર્યક્રમ યોજાયા હતા. વાપી શહેર અને નોટિફાઈડ ભાજપ દ્વારા સાંજના 4 કલાકે વાપી જીઆઈડીસી ગુંજન ‘વંદે માતરમ્’ ચોકમાં ભાજપના કાર્યકરોએ અધીર રંજનનું પૂતળું બાળી હાય હાય ના નારા સાથે દેખાવો યોજ્યા હતા.
વાપી ગુંજનમાં યોજાયેલ પુતળા દહન કાર્યક્રમમાં મોટી સંખ્યામાં ભાજપ સંગઠનના હોદ્દેદારો અને કાર્યકરો જોડાયા હતા. કોંગ્રેસ સાંસદ અધીર રંજનનું પૂતળું બાળી વિરોધ પ્રદર્શન કરવામાં આવ્યું હતું. સોનિયા ગાંધી હાય હાયના નારા સાથે અધીર રંજન માફી માંગે જેવાસૂત્રોચ્ચાર કાર્યકરોએ કર્યા હતા. વિરોધ પ્રદર્શનના કાર્યક્રમમાં જિલ્લા મહામંત્રી શિલ્પે દેસાઈ, વાપી શહેર ભાજપ પ્રમુખ સતિષ પટેલ, પાલિકા પ્રમુખ કાશ્મિરાબેન શાહ, ઉપપ્રમુખ અભય શાહ સહિતના આગેવાનો ઉપસ્થિત રહ્યા હતા. જીઆઈડીસી પોલીસ જવાનો ખડે પગે રહ્યા હતા તેઓએ પુતળાને ઝૂંટવી સુરક્ષિત સ્થાને લઈ જઈ બુઝાવી દીધું હતું.
