કંપની અગનજ્વાળામાં લપેટાઈઃ સમગ્ર વિસ્તારમાં દોડધામ સાથે અફરાતફરી મચી જવા પામી
(વર્તમાન પ્રવાહ વાપી બ્યુરો)
વાપી, તા.14: વાપી માટે મંગળવારનો દિવસ કમનસીબ સાબિત થયો છે. મળસ્કે ડુંગરી ફળીયામાં એક ડઝન ઉપરાંત ભંગારના ગોડાઉનોમાં ભિષણ આગ લાગ્યાની ઘટના બાદ માત્ર થોડાક જ કલાકોમાં જીઆઈડીસી ફોર્ટીશેડ વિસ્તારમાં આવેલી એક કેમિકલ કંપનીમાં ધડાકાભેર બ્લાસ્ટ થતાની સાથે જ જોતજોતામાં કંપની આગની અગનજ્વાળાઓ લપેટાઈ જતા સમગ્ર વિસ્તારમાં દોડધામ સાથે અફરાતફરી મચી જવા પામી હતી.
વાપી જીઆઈડીસી ફોર્ટીશેડ વિસ્તારમાં આવેલ વિરાજ કેમિકલ નામની કંપનીમાં મંગળવારે સાંજના સુમારે અચાનક ધડાકા સાથે આગ લાગી હતી. આગની ઘટના બાદ પોલીસ અને ફાયરબ્રિગેડના ફાઈટરો ઘટના સ્થળે દોડી આવી આગ બુઝાવવાની જહેમત હાથ ધરાઈ હતી. આગમાં કોઈ જાનહાનીના અહેવાલ નથી પરંતુ છેલ્લે જાણવા મળ્યા મુજબ કંપનીમાં કોઈ કેમિકલ પ્રોસેસ કે મેન્યુફેક્ચર ચાલતું નહોતું પરંતુ ટ્રેડીંગ ગોડાઉન કાર્યરત છે. સંભવત જ્વલનશીલ કેમિકલ સ્ટોકના કારણે આગ લાગી હોવાનું મનાઈ રહ્યું છે.
