વાપી કોચરવા ગામમાં પોતાને ડોન તરીકે ઓળખાવતા મિતેશ પટેલે ફરિયાદી અનુ.જાતિનો હોવાથી પોતાના બૂટ ઉપર નાક ઘસીને માફી માંગવાનું કહેતા તેનો ઈન્કાર કરતા આરોપી અને તેના સાગરિતોએ ધારદાર હથિયારથી કરેલો હૂમલો
(વર્તમાન પ્રવાહ ન્યુઝ નેટવર્ક)
દમણ, તા.02: દમણનાઆંટિયાવાડ ખાતે વાપીના કોચરવા ગામના માથાભારે અને પોતાને ડોન તરીકે ઓળખાવતા આરોપી મિતેશ પટેલ અને તેમના સાથીઓએ એક વ્યક્તિ ઉપર પ્રાણઘાતક હૂમલો કર્યો હોવાની ઘટના દમણ પોલીસમાં નોંધાઈ છે.
પ્રાપ્ત માહિતી પ્રમાણે વાપી નજીક કોચરવા ખાતે રહેતા ફરિયાદી કિરીટ પરમારે જણાવ્યું હતું કે, બે દિવસ પહેલાં મિતેશ પટેલે કરેલ ફોન ફરિયાદીના મિત્રએ ઉઠાવ્યો હતો. તે વખતે મિતેશ પટેલ અને ફરિયાદી કિરીટ પરમારના મિત્ર વચ્ચે ફોન ઉપર બોલાચાલી થઈ હતી. આ વાતની માફી માંગવા માટે કિરીટ પરમાર પોતાના મિત્રને લઈને આંટિયાવાડના લક્કી ઢાબામાં આવ્યા હતા. મિતેશ પટેલની માંગણી મુજબ કિરીટ પરમારના દોસ્તે માફી માંગી હતી. પરંતુ મિતેશ પરમારને બૂટ ઉપર નાક રગડી માફી માંગતો વિડીયો લેવા માટે કહ્યું હતું. જેના ઉપર કિરીટ મના કરી હતી. આ વાતથી ગુસ્સે ભરાયેલા મિતેશ પટેલ અને તેના મિત્રોએ કિરીટ અને તેના સાથી ઉપર ધારદાર હથિયારથી પ્રાણઘાતક હૂમલો કર્યો હતો અને ગંભીર ઈજા પહોંચાડી હતી. હૂમલો કર્યા બાદ તમામ હૂમલાખોરો થાર ગાડીમાં ફરાર થઈ ગયા હતા.
મળતી માહિતી પ્રમાણે મિતેશ પટેલે આ પહેલાં પણ દમણમાં આ પ્રકારની જ મોડસ ઓપરન્ડીથી હૂમલો કરેલ હોવાની જાણકારી મળી છે અને હાલ આરોપી તેકેસમાં બેઈલ ઉપર છૂટેલ હોવાની પણ જાણકારી મળી રહી છે.
મળતી માહિતી પ્રમાણે ફરિયાદી અને પીડિત અનુ.જાતિ વર્ગના હોવાથી અનુ.જાતિ અને જનજાતિ અત્યાચાર નિવારણ ધારા હેઠળ પણ કેસ નોંધવો જરૂરી બન્યો છે. દમણ પોલીસે આઈપીસી 307 તથા આરડબ્લ્યુ 34 અંતર્ગત મિતેશ પટેલ અને અન્ય વિરૂદ્ધ ગુનો નોંધી વધુ તપાસ હાથ ધરી છે.
