સાંકડી જગ્યામાં શાકભાજી વેપારી એકત્ર થઈ વેચાણ કરી રહ્યા છે. લોકો હરી ફરી પણ શકતા નથી
(વર્તમાન પ્રવાહ વાપી બ્યુરો)
વાપી, તા.20: વાપી જુના શાકભાજી માર્કેટમાં ગેરકાયદે દબાણો ખુબ થઈ ગયા હોવાથી રોડ પહોળો કરવા માટે નગરપાલિકાએ ડિમોલેશન કાર્યવાહી થોડા સમય પહેલાં કરી હતી ત્યારે મોટો હોબાળો પણ થયો હતો. ઘણા જુના જોગીઓની ગરાસ લૂંટાઈ હતી તેથી ભારે બુમાબુમ કરી હતી. ડિમોલિશન બાદ પાલિકા દ્વારા નવો પહોળો રોડ બનાવવાની ફક્ત વાતોજ કરી હોય એવુ લાગે છે. હજુ સુધી રોડ બનાવાના કોઈ ઠેકાણા દેખાતા નથી.
વાપી જુના શાકમાર્કેટમાં ડિમોલિશન બાદ રોડ પહોળો કરાયો છે. દબાણો હટી ગયા છે. તેથી અહીં વેપાર ધંધો કરતા શાકભાજીના વેપારી આગળના ભાગે મચ્છી માર્કેટ પાસે ઘીચતામાં ફરી ગોઠવાઈ ગયા છે તેથી અવર જવરની પારાવાર મુશ્કેલી પડે છે. સાંકડી જગ્યામાં કીડીયા ઘરની જેમ માણસો ઉભરાઈ રહ્યા છે તેથી અસામાજીક તત્વોને ખુલ્લુ મેદાન મળી ગયું છે. જ્યાં ડિમોલિશન કરાયું છે તે જગ્યાએ હજુ સુધી રોડ બનાવવાની ફુરસદ પાલિકાને મળી નથી. એટલે સરવાળે તો આમ જનતા જ હેરાન થઈ રહી છે.
