જીઆઈડીસી તંત્ર માટે કોલોની વિસ્તાર
ઓરમાન મનાતો હોવાનો લોકોમાં રોષ
(વર્તમાન પ્રવાહ વાપી બ્યુરો)
વાપી, તા.25: વાપીમાં વરસાદનું આગમન થતાની સાથે જ તેની આડઅસરોનો પ્રારંભ થઈ ચૂક્યો છે. તેવી સ્થિતિ વાપી જી.આઈ.ડી.સી. ચણોદ કોલોની વિસ્તારની થઈ છે. પહેલા જ વરસાદે ચણોદ કોલોની ભેટ ધરી હોય તેમ આંતરિક રોડ બેહાલ બની ચૂક્યા છે.
વાપી જી.આઈ.ડી.સી. નોટીફાઈડ એરીયા અંતર્ગત આવતો ચણોદો કોલની વિસ્તારમાં નાગરિકી સુવિધાઓ માટે દુર્લક્ષ સેવાતુ હોય તેવી હકિકતો પ્રથમ વરસાદમાં જ ઉજાગર થવા માંડી છે. કોલોનીના આંતરિક રોડો કાદવ-કીચડ અને ગંદકીથી ભારે ખાનાખરાબી સર્જાઈ ચૂકી છે. વાહનો સ્લીપ ખાવા સાથે વાહનો પસાર થાય ત્યારે કાદવ ઉછળે છે. પરિણામ સ્થાનિક રહીશો એવુ માની રહ્યા છે કે, ચણોદ કોલોની વિસ્તાર જી.આઈ.ડી.સી. માટે ઓરમાન વિસ્તાર હોય તેવો આક્રોશ લોકોમાં પ્રવર્તિ રહ્યો છે. હજુ તો ચોમાસાનો પ્રારંભ જ છે ત્યાં જ રસ્તાઓ બેહાલ છે. આ વિસ્તારમાં તંત્ર દ્વારા પ્રિમોન્સુનની કોઈ કામગીરી કરાઈ હોય તેવુ જણાઈ રહ્યું નથી. લોકો એવો પણકટાક્ષ કરી રહ્યા છે કે શું ગુંજન હોય તો આવી સ્થિતિ લોકો ચલાવી લે ખરા?
