આરોપી અકરમ હુસેન ઉર્ફે બદ્દામ રમજાનઅલી રહે.લવાછા, સલમાન (સલ્લુ) મુસ્તકીમ નાની તંબાડીની ધરપકડ કરી
(વર્તમાન પ્રવાહ વાપી બ્યુરો)
વાપી, તા.19: વાપી જીઆઈડીસી વિસ્તારમાં રાહદારીઓ પાસેથી વાત કરતા હોય તેવા સમયે મોબાઈલ સ્નેચિંગ કરી મોપેડ ઉપર ફરાર થઈ જતા હોવાની ફરિયાદ બાદ જીઆઈડીસી પોલીસે બે લબરમુછીયા યુવકોને ત્રણ મોબાઈલ ફોન અને મોપેડ સાથે મોરારજી સર્કલ ગુંજન પાસેથી દબોચી લઈ જેલ ભેગો કર્યો હતો.
ભડકમોરાવાપી રહેતા કંપનીમાં નોકરી કરતા નિખિલસિંગ પ્રેમશંકરસિંગ ગત બુધવારે નોકરી ઉપર જઈ રહેલ ત્યારે માતા સાથે મોબાઈલથી થર્ડ ફેઝ રોડ હનુમાન મંદિર પાસે વાત કરતા હતા ત્યારે બે યુવાનો મોપેડ ઉપર આવી ફોન ઝુંટવીને ફરાર થઈ ગયા હતા. આ અંગે નિખિલસિંગએ પોલીસમાં ફરિયાદ નોંધાવી હતી. જીઆઈડીસી પોલીસ હરીશ કમરૂલને મળેલી બાતમી આધારે મોરારજી સર્કલ પાસે ગુંજનથી અકરમ હુસેન ઉર્ફે બદ્દામ રમજાન અલી રહે.લવાછા કિશનની ચાલી અને સલમાન ઉર્ફે સલ્લુ મુસ્તકીમ રહે.નાની તંબાડી એટી ફળીયા ઈશ્વરભાઈની ચાલને નંબર પ્લેટ વગરની મોપેડ સાથે ઝડપી પાડયા હતા. પોલીસે ત્રણ મોબાઈલ મોપેડ મળી 99999 રૂપિયાનો મુદ્દામાલ જપ્ત કર્યો હતો.
