નજીકના ભૂતકાળમાં અથોલા ગામ ખાતે એક ડુંગરને કોતરી તેમાંથી હજારો ટન માટીની ચોરી કરવામાં આવી હતી, જે સંદર્ભે ગામલોકો દ્વારા જિલ્લા કલેક્ટર સુધી ફરિયાદ કરાઈ છતાં કોઈ પગલાં નહીં લેવાયા હતા
(વર્તમાન પ્રવાહ ન્યુઝ નેટવર્ક)
સેલવાસ, તા.19 : દાદરા નગર હવેલીના મહેસૂલ વિભાગના સેલવાસ મામલતદારની ટીમને મોરખલ ગામમાં ગેરકાયદે માટી/મોર્રમનું ખનન થઈ રહ્યું હોવા અંગેની જાણકારી મળતા મામલતદારની ટીમે તાત્કાલિક કાર્યવાહી હાથ ધરી સ્થળ ઉપર છાપો મારી માટી-મોર્રમ ભરેલ બે ડમ્પર ટ્રક પકડી પાડયા હતા અને જપ્ત કરવામાં આવ્યા હોવાની માહિતી મળી છે. જપ્ત કરાયેલા ડમ્પરો ઉપર ઓન ડયુટી પી.ડબ્લ્યુ.ડી. વિભાગના સ્ટીકરો મારેલા પણ જોવા મળ્યા હતા.
હવે લોકોમાં પ્રશ્ન ચર્ચાઈ રહ્યો છે કે કોન્ટ્રાક્ટરો દ્વારા પી.ડબ્લ્યુ.ડી.ના નામે ખુલ્લેઆમ ગેરકાયદેસર માટી ખનન કરી રહ્યા છે કે કેમ? અગાઉ પણ અથોલા ગામે એક ડુંગરને કોતરી એમાંથી પણ હજારો ટન માટીની ચોરી કરવામાં આવી હતી, જે સંદર્ભે ગામલોકો દ્વારા કલેક્ટર સુધી ફરિયાદ કરવામાં આવી હતી છતાં પણ તેઓ સામે જરૂરી કાર્યવાહી કરવામાં આવી ન હતી.
