(વર્તમાનપ્રવાહ ન્યુઝ નેટવર્ક)
વાપી (ચલા), તા.09: વાપી જીઆઈડીસીના ભડકમોરામાં આવેલ ગલેના મેટલ્સ પ્રા.લિ. કંપનીમાંથી તસ્કરોએ રૂા.1.33 લાખના સીસાની પ્લેટની ચોરી કરી ગયા હતાં. જે બનાવની ફરિયાદ વાપી ઉદ્યોગનગર પોલીસ મથકમાં કરવામાં આવી હતી.
વાપી ઉદ્યોગનગર પોલીસ સૂત્રો પાસેથી મળતી વિગત અનુસાર, વાપી જીઆઈડીસીના ભડકમોરા સેલવાસ માર્ગ સ્થિત ગલેના મેટલ્સ પ્રા.લિ. કંપની આવેલી છે. જેમાં સીસાનો કાચો માલ લઈ મટીરીયલ તૈયાર કરવામાં આવે છે. રાબેતા મુજબ કંપનીમાં કામ પત્યા બાદ સાંજે સાડા પાંચેક વાગ્યે બંધ કરી દેવામાં આવે છે. ગત તારીખ 4-12-21 ના રોજ શનિવારે સાડા પાંચેક વાગ્યે કંપની બંધ કરી હતી અને બીજા દિવસે રવિવાર રજા હોવાથી કંપની બંધ રાખી હતી. જે સમયગાળા દરમિયાન તસ્કરોએ કોઈક સાધન વડે કંપનીનો દરવાજો ખોલી અંદર પ્રવેશી સીસાની પ્લેટ નંગ 18 ચોરી કરી ગયા હતાં. સોમવારે કંપની ખુલતા ચોરી થયાનું માલુમ પડયું હતું. ચોરી થયેલ સીસાની પ્લેટની કિંમત રૂા.1,33,200/- થાય છે. જે બનાવની ફરિયાદ મનિષ રાજેન્દ્ર દોશી(ઉં.આ.49, રહે. મુંબઈ) એ વાપી ઉદ્યોગનગર પોલીસ મથકમાં નોંધાવી હતી.
