સૌથી વધારે કેસ રાબેતા મુજબ વલસાડમાં 124 કેસ નોંધાયા
(વર્તમાન પ્રવાહ વાપી બ્યુરો)
વાપી, તા.12
વલસાડ જિલ્લામાં કોરોનાએ ખતરાની ઘંટી વગાડી દીધી છે. આજે બુધવારે અધધ… કહી શકાય તેમ પોઝિટિવ કેસનો સ્કોર બેવડી સદીને વટાવીને 218 નોંધાયો છે. જે વહીવટી તંત્ર સમાજ અને આમ જનતા માટે સાવધાન બનવાની ગંભીર સ્થિતિ ઉભી થઈ ચૂકી છે.
વલસાડ જિલ્લામાં કોરોના બેફામ બની ચૂક્યો છે. છેલ્લા સપ્તાહમાં રોજેરોજ કેસો નવા ઉમેરાતા જાય છે. જે હવે બેવડી સદી આંબીને 218 કેસ આજે નોંધાયા છે. ખાસ ચિંતાજનક બાબત જિલ્લામાં એ ઉદ્દભવી રહી છે કે સૌથી વધારે કેસો વલસાડ વિસ્તારમાં કુલ કેસોમાં અડધાથી વધારે નોંધાઈ રહ્યા છે. આજે કુલ 218 કેસ પૈકી વલસાડ વિસ્તારમાં 124 છે જ્યારે પારડીમાં 24, વાપીમાં 38, ઉમરગામમાં 18 અને ધરમપુરમાં 14 છે જ્યારે કપરાડા વિસ્તારમાં આજે ઝીરો કેસ નોંધાયો હતો. બેફામ બની રહેલ કોરોના સંક્રમણને લઈ આરોગ્ય તંત્રની ઊંઘ હરામ બની ચૂકી છે.
