જિલ્લા સત્ર ન્‍યાયાલયનો શકવર્તી ચુકાદો: ખાનવેલ-નાશિક રોડ પર એક વ્‍યક્‍તિની હત્‍યા કરનાર બે આરોપીઓને આજીવન કેદની સજા

(વર્તમાન પ્રવાહ ન્‍યુઝ નેટવર્ક)
સેલવાસ,તા.01: દાદરા નગર હવેલીના સેલવાસ પોલીસ સ્‍ટેશનમાં તા.01 જૂન, 2018ના રોજ ટ્રક નંબર જીજે-15-યુયુ-0355ના ચાલક અંસાર અજીમુલ્લા ખાન વિરુદ્ધ આઇપીસીની કલમ 407 મુજબ ફરિયાદ નોંધવામા આવી હતી. તપાસ દરમ્‍યાન ટ્રક અને એમાં રાખવામાં આવેલ સામાનને જપ્ત કરવામાં આવ્‍યો હતો.
4 જૂનના રોજ પોલીસને મળેલ બે અજાણ્‍યા વ્‍યક્‍તિઓને પણ સેલવાસ પોલીસ સ્‍ટેશનમાં લાવવામાં આવ્‍યા હતા. પોલીસ દ્વારા ચાલકના સંબંધીની પૂછપરછ અને તપાસ દરમ્‍યાન જાણવા મળેલ કે ટ્રકનો ચાલક અંસાર અજીમુલ્લા ખાન રહેવાસી-વાપી, જે વાપીથી નાશિક તરફ જઈ રહ્યો હતો જેની લાશ આરોપીઓએ નાશિક રોડ પર સડકની કિનારે ફેંકી દીધી હતી. આ ઘટના અંગેની વધુ તપાસ પી.આઈ. હરેશસિંહ રાઠોડને સોપવામાં આવી હતી. પોસ્‍ટ મોર્ટમ રિપોર્ટમાં મોતનું કારણ ગળું દબાવીને હત્‍યા કરાઈ હોવાનું બહાર આવ્‍યું હતું. ટ્રકમાંથી મળી આવેલ ચાલકની હત્‍યા કર્યા બાદ માલસામાન સહીત ટ્રકની ચોરી કરવામાં આવી હતી. જેથી આઈપીસી 302, 394, 201 મુજબ આરોપી સચિન રંજીત ઢકને અને વિકાસ અજીનાથ બડે વિરુદ્ધગુનામાં કલમ 34 જોડવામાં આવી હતી. આ કેસને દાનહના જિલ્લા સત્ર ન્‍યાયાલયમાં ચાર્જશીટ દાખલ કરવામાં આવી હતી. ત્‍યારબાદ સુનાવણી દરમ્‍યાન તપાસમાં સાક્ષીઓના નિવેદનોના આધારે તેમજ પુરાવાના આધારે એડવોકેટ નિપુણ રાઠોડની ધારદાર દલીલના આધારે સત્ર ન્‍યાયાધીશ શ્રી એસ.એસ.અડકરે બન્ને આરોપીઓને આઇપીસીની કલમ 302, 392 અને 201, 34 મુજબ આજીવન કેદની સખત સજા સંભળાવી હતી.