(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.28: ચીખલી તાલુકાના ફડવેલ ગામે ઘરની બહાર બાથરૂમમાં અચાનક દીપડી ધસી આવતા એક સમયે સ્થાનિકોમાં ગભરાહટનો માહોલ ફેલાઈ ગયો હતો. જોકે વન વિભાગ દ્વારા રેસ્કયુ કરાઈ તે પૂર્વે જ દીપડી અચાનક ઢળી પડ્યા બાદ મોત નીપજ્યું હતું.
પ્રાપ્ત માહિતી મુજબ ચીખલી તાલુકાના ફડવેલ ગામના નાગજી ફળીયામાં ચારેક વાગ્યાના અરસામાં કમલેશ ઠાકોરભાઈ પટેલના ઘરની પાછળ તેમના બાથરૂમમાં અચાનક દીપડી આવી ચઢી હતી. જેને લઈને લોકોમાં કુતુહલ સાથે એક સમયે ભયનો માહોલ સર્જાયો હતો. અને મોટી સંખ્યામાં લોકો એકત્ર થઈ ગયા હતા. આ અંગેની જાણ સ્થાનિક તાલુકા સભ્ય મહેશભાઈ, સરપંચ પતિ હરીશભાઈ સહિતનાઓ દ્વારા વનવિભાગને જાણ કરવામાં આવી હતી. જોકે આ દરમ્યાન દીપડી નજીકમાં ધનસુખભાઈની નર્સરીમાં જઈને બેસી ગઈ હતી.
ચીખલી વન વિભાગની રેન્જના આરએફઓ આકાશભાઈ પડશાળા સહિતનો સ્ટાફ ફડવેલ ગમે ધસી જઈ દીપડીને સહી સલામત રીતે પાંજરામાં પુરી કબ્જો લેવા માટે રેસ્કયુ હાથ ધર્યું હતું. પરંતુ આ દરમ્યાન નર્સરીમાં જ દીપડી અચાનક ઢળી પડી હતી. અને સાથે જ તેનું મોત નીપજ્યું હતું. દીપડી કદાચપહેલેથી જ બીમાર હોવાનું કે કંઈક ખાવામાં તકલીફ સર્જાઈ હોવાનું પ્રાથમિક અનુમાન લગાવાઈ રહ્યું છે. પરંતુ પીએમ રિપોર્ટ બાદ જ દીપડીના મૃત્યુનું ચોક્કસ કારણ જાણી શકાશે.
