મંગળવારે રાતે વરસેલા અતિશય વરસાદે ચોમેર આફત વેરી : ઘરમાં સરસામાન-રાચરચિલું તરતું થયું
(વર્તમાન પ્રવાહ વાપી બ્યુરો)
વાપી, તા.12: વલસાડ જિલ્લામાં છેલ્લા દશ-બાર દિવસથી વરસી રહેલો વરસાદ જનજીવન પ્રભાવિત કરી ચૂક્યો છે. જિલ્લાની તમામ નદીઓ બે કાંઠે વહી રહી છે. કેટલાય પુલ-કોઝવે ડૂબી ચૂક્યા છે. અનેક રસ્તા અવર જવર થઈ શકે તેમ ન હોવાથી બંધ થઈ ચૂક્યા છે. વરસાદી પ્રકોપ ચારે તરફ તારાજી વેરી રહ્યો છે. તેવો વધુ એક પ્રકોપ વરસાદે વલસાડ નજીક આવેલ માલવણ ગામ ઉપર કર્યો છે. મંગળવારે પડેલા મુશળધાર વરસાદને લઈ ગામ આખું ટાપુમાં ફેરવાઈ ચૂક્યું છે. તેમજ આજુબાજુના બે કિલોમીટરના વિસ્તારમાં પાણી ભરાયા.
ચોમાસાનો હજુ તો પ્રારંભ જ છે. પ્રથમ રાઉન્ડનો વરસાદ શરૂ થયો છે ત્યારથી અટક્યો જ નથી. પરિણામેજિલ્લાના તમામ તાલુકાઓ વરસાદને લીધે અસરગ્રસ્ત બની રહ્યા છે. અનેક ગામોને જોડતા અવર જવર માટેના કોઝવે ઓવરફલો થતા મોટુ જળ સંકટ ગામેગામ વરસાદે સર્જ્યું છે. વલસાડ નજીકનું માલવણ ગામ આખું બેટમાં ફેરવાઈ ચૂક્યું છે. અતિશય વરસાદથી ગામમાં ઘુંટણ સમા પાણી ભરાતા લોકો ઘરોમાં પુરાઈ રહ્યા છે. તેમજ કેટલાક નિચાણમાં આવેલા ઘરોમાં તો પાણી ભરાઈ જતા ઘરનો સરસામાન, રાચરચિલું પાણીમાં તરતું થયેલું ઠેર ઠેર જોવા મળી રહ્યું છે. હજું મેઘરાજાની સવારી યથાવત ચાલું જ છે. આગામી સમયે વધું આકાશી આફત ત્રાટકે એવી શક્યતાઓ ઈનકારી શકાય એમ નથી.