સ્ટ્રીટ લાઈટનો કેબલ અચાનક ભભૂકી ઉઠેલો :
આગે વિકરાળ સ્વરૂપ ના પકડતા મોટી દુર્ઘટના ટળી
(વર્તમાન પ્રવાહ વાપી બ્યુરો)
વાપી, તા.12: વાપી ચલા પ્રાથમિક શાળા નજીક પાલિકા દ્વારા સ્ટ્રીટ લાઈટની મરામત અંગેની મોડી રાતે કામગીરી ચાલી રહી હતી તે દરમિયાન મેઈન કેબલમાં અચાનક સ્પાર્ક થતાં આગ ભભૂકી ઉઠી હતી. જાહેર માર્ગ ઉપર લાગેલી આગને લઈ દોડધામ મચી જવા પામી હતી.
ચલા પ્રાથમિક શાળા નજીક ગત રાતે પાલિકા દ્વારા સ્ટ્રીટ લાઈટની કામગીરી ચાલી રહી હતી તે દરમિયાન મેઈન કેબલમાં સ્પાર્ક થતા શોર્ટ સર્કિટ સર્જાતા આગ ભભૂકી ઉઠી હતી. મોડી રાતમાં ખાસ અવર જવર નહોતી પરંતુ મેઈન રોડ ઉપર આગ લાગતા દોડધામ જરૂર મચી ગઈ હતી. જો કે આગ વિકરાળ સ્વરૂપ પકડે તે પહેલા બુઝાવી દેવામાં આવતા મોટી દુર્ઘટના જરૂર ટળી હતી. આગની ઘટના અંગેનો લોકોએ વિડીયો વાઈરલ કરતા સમાચાર શહેરમાં વાયુવેગે ફેલાઈ ગયા હતા.
