દીવ જિલ્લા ભાજપના નવનિયુક્ત અધ્યક્ષ મોહનભાઈ લક્ષ્મણને આગામી લોકસભાની ચૂંટણીને નજર સમક્ષ રાખી ખાંડાની ધાર ઉપર ચાલવા પડનારી ફરજઃ સંગઠનના વેરવિખેર માળખાને સીધું કરવા તાકાત લગાવવી પડશે
(વર્તમાન પ્રવાહ ન્યુઝ નેટવર્ક)
દીવ, તા.12 : દીવ જિલ્લા ભાજપ પ્રમુખ તરીકે શ્રી મોહનભાઈ લક્ષ્મણની વરણીની જાહેરાત આજે પ્રદેશ ભાજપ પ્રમુખ શ્રી દીપેશભાઈ ટંડેલે કરી હતી. શ્રી મોહનભાઈ લક્ષ્મણની દીવ જિલ્લા ભાજપના કર્ણધાર તરીકે નિમણૂક થતાં પાયાના કાર્યકરોમાં પણ આનંદ અને ઉત્સાહનું વાતાવરણ પેદા થયું છે.
દીવ જિલ્લા ભાજપના નિવર્તમાન પ્રમુખ શ્રી બિપિનભાઈ શાહે ભાજપ સંગઠનના સંવિધાનથી વિપરીત 9 વર્ષ સુધી અધ્યક્ષ તરીકેની ફરજ બજાવી છે. હવે દીવ જિલ્લા ભાજપની કમાન શ્રી મોહનભાઈ લક્ષ્મણને મળતાં તેમની સ્થિતિ આગામી લોકસભાની ચૂંટણીને નજર સમક્ષ રાખતાં ખાંડાની ધાર ઉપર ચાલવા જેવી થવાની છે. કારણ કે, દીવ જિલ્લા ભાજપનું માળખું લગભગ વેરવિખેર જેવું છે. તેમાં સુધારો-વધારો કરવાની કપરી જવાબદારી શ્રી મોહનભાઈ લક્ષ્મણે ઉઠાવવી પડશે.
અત્રે નોંધનીય છે કે, પ્રદેશ અધ્યક્ષ શ્રી દીપેશભાઈ ટંડેલ, સાંસદ શ્રી લાલુભાઈ પટેલ, દીવ જિલ્લાભાજપ પ્રભારી શ્રી જીજ્ઞેશ પટેલ, ગુજરાત ભાજપ ઓ.બી.સી. મોર્ચાના પ્રભારી અને પ્રદેશના કદાવર નેતા શ્રી વિશાલભાઈ ટંડેલ સહિત પ્રદેશનું સમગ્ર માળખું નવનિયુક્ત અધ્યક્ષ શ્રી મોહનભાઈ લક્ષ્મણની સાથે હોવાથી આગામી ચૂંટણીમાં દીવ જિલ્લો નિર્ણાયક ભૂમિકા ભજવશે એવી આશા પણ પ્રબળ બની છે.