(વર્તમાન પ્રવાહ ન્યુઝ નેટવર્ક)
દમણ, તા. 16
સંઘપ્રદેશ દાદરા નગર હવેલી અને દમણ-દીવમાં પંચાયતી રાજને મજબુત કરી ગ્રામ પંચાયતોને કાર્યક્ષમ બનાવવા માટે ઈતિહાસમાં પહેલી વખત દરેક ગ્રામ પંચાયતોમાં સેક્રેટરી અને ગ્રામ સેવકોની નિમણૂક કરવામાં આવી છે. આ પહેલાં એક સેક્રેટરી પાસે બીજી ગ્રામ પંચાયતોનો પણ અખત્યાર રહેતો હતો અને ગ્રામ સેવકોની સ્થિતિ પણ એવી જ હતી.
સંઘપ્રદેશના પ્રશાસક શ્રી પ્રફુલભાઈ પટેલના દિશા-નિર્દેશ હેઠળ પંચાયતી રાજ વિભાગના સચિવ શ્રી ગૌરવસિંહ રાજાવતે દાદરા નગર હવેલીની 20, દમણની 14 અને દીવની 4 ગ્રામ પંચાયતોમાં પુરા સમયના સેક્રેટરી અને ગ્રામ સેવકોની નિમણૂક કરી છે. પંચાયતના સેક્રેટરીને ગ્રામ સેવકોનો વધારાનો હવાલો પણ સુપ્રત કરાયો છે જેના કારણે એક જ છત્ર હેઠળ સરકારની વિવિધ યોજનાઓનું અમલીકરણ પણ ગ્રામ્ય વિસ્તારોમાં શક્ય બનશે.
સંઘપ્રદેશની દરેક ગ્રામ પંચાયતોને સેક્રેટરી અને ગ્રામ સેવક પુરા સમય માટે મળવાથી પંચાયત સ્તરે વિવિધ કામોમાં પણ ઝડપ આવશે અને પારદર્શકતા પણ જળવાશે.