આરોપી હિતેશ જીવણ પટેલે ચપ્યુના ઘા મારી પ્રકાશ હળપતિની હત્યા કરી હતી
(વર્તમાન પ્રવાહ વાપી બ્યુરો)
વાપી, તા.૦૧
વાપી નજીક આવેલ તીધરા ગામે સ્મશાન યાત્રા દરમિયાન ગામના ઍક યુવાને અન્ય યુવાનની ચપ્પુના ઘા મારી હત્યા કરી નાખી હતી, જેનો કેસ વાપી સેશન્સ કોર્ટમાં ચાલી જતા નામદાર કોર્ટે આરોપીને આજીવન કેદની સજા અને દંડ ફટકારતો હુકમ કર્યો હતો.
ચકચારી મર્ડરની ઘટના વાપી નજીક તીધરા ગામે સન ૨૦૧૭ માર્ચની ૩૦ તા.ના રોજ ઘટી હતી. ગામની સ્મશાન યાત્રામાં હિતેશ જીવન પટેલ નામના યુવાને કોઈ કારણોસર પ્રકાશ હળપતિ નામના યુવાનને ચપ્પુના ઘા મારી મોતને ઘાટ ઉતારી દીધો હતો.
આ મર્ડર કેસ ઍડિશનલ સેશન્સ કોર્ટ વાપીમાં ચાલી જતા નામદાર કોર્ટે આરોપી હિતેશ પટેલને તકસીરવાર થરાવ્યો હતો અને વિદ્વાન જજશ્રી કે.જે મોદીઍ આરોપીને આજીવન કેદ અને ૧ હજારનો દંડ ફટકારતો હુકમ કર્યો હતો.
