બીલીમોરા નગરપાલિકા વિસ્તારના નાગરિકોને સલામત સ્થળે ખસી જઈ સહકાર આપવા લાઉડ સ્પીકર દ્વારા એનાઉન્સમેન્ટ કરાયું
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.02: સમગ્ર દક્ષિણ ગુજરાત સહિત ઉપરવાસમાં થયેલ ભારે વરસાદના કારણે નવસારી જિલ્લામાં પૂર્ણા, કાવેરી અને અંબિકા નદીમાં જળસ્તર વધવાની સંભાવના રહેતાનવસારી જિલ્લા તંત્ર સવારથી જ આગોતરી કામગીરીમાં વ્યસ્ત થઈ ગયું છે. જિલ્લાની ત્રણે નદીઓની આસપાસ અને નીચાણવાળા વિસ્તારોમાં રહેતા લોકોને જિલ્લા વહીવટી તંત્રના સંકલનમાં રહી, સાવચેત રહેવા અને સુરક્ષિત સ્થળે ખસી જઇ સહકાર આપવા નવસારી જિલ્લા તંત્ર દ્વારા અનુરોધ કરાયો હતો.
આ ઉપરાંત જિલ્લાની બીલીમોરા નગર પાલિકા દ્વારા નદીની આસપાસ અને નીચાણવાળા વિસ્તારોમાં લાઉડ સ્પીકરના માધ્યમથી એનાઉન્સમેન્ટ કરી નાગરિકોને સલામત સ્થળે ખસી જઈ સહકાર આપવા સાવચેત કરાયા હતા.