રોયલ ચેમ્બર્સ ઘટેલી ઘટના સીસીટીવીમાં કેદ થઈ
(વર્તમાન પ્રવાહ વાપી બ્યુરો)
વાપી, તા.24: વાપી ચાર રસ્તા પાસે આવેલ કચ્છી હોલસેલ માર્કેટ સ્થિત સિગારેટના ગોડાઉનમાં હજારો રૂપિયાની કિંમતની સિગારેટ ચોરટાઓ ચોરી કરી અંધારામાં ફરાર થઈ ગયા હતા. સમગ્ર ચોરીની ઘટના સીસીટીવી કેમેરામાં કેદ થઈ હતી.
વાપી ચાર રસ્તા કચ્છી હોલસેલ માર્કેટમાં આવેલ રોયલ ચેમ્બર્સમાં જે.પી. પટેલ એન્ડ સન્સ નામની સિગારેટ ડીસ્ટ્રીબ્યુટર્સની ઓફીસ અને ગોડાઉન આવેલા છે. રવિવારે માર્કેટ બંધ હતું તે દરમિયાન રાત્રીના સમયે બે થી ત્રણ ચોરટાઓએ શટર તોડી ગોડાઉનમાં ઘૂસી સિગારેટ જથ્થાની ચોરી કરી ગયા હતા.સવારે દુકાન માલિક શશીભાઈ પટેલ આવીને જોયુ તો દુકાન ઓફીસ શટરના તાળા તુટેલા જોયા હતા. તપાસ કરતા સિગારેટ કાર્ટુન અને બોરાઓમાંથી જુદા જુદા પ્રકારની સિગારેટના બોક્ષ ચોરાયાનું માલુમ પડયું હતું. ચોરી અંગે જીઆઈડીસી પોલીસમાં શશીકાંત પટેલએ પોલીસ ફરિયાદ નોંધાવી હતી. પોલીસે સીસીટીવી ફૂટેજ કવર કરીને વધુ તપાસ હાથ ધરી છે. ચોરી કરવા બે થી ત્રણ ઈસમો ફુટેજમાં ચોરી કરતા દેખાઈ રહ્યા છે.
