45 ગામના સરપંચ અને તલાટી મંડળના સભ્યો તાલુકા વિકાસ અધિકારી સામે ફરિયાદ-રજૂઆત કરવા ધારાસભ્ય કાર્યાલય પહોંચ્યા હતા
(વર્તમાન પ્રવાહ વાપી બ્યુરો)
વાપી, તા.24: ધરમપુર તાલુકા ધારાસભ્યના કાર્યાલય ઉપર 45 ગામના સરપંચ અને તલાટી મંડળના સભ્યો ટીડીઓ વિરૂધ્ધ રજૂઆત અને ફરિયાદ કરવા પહોંચ્યા છે. આ તમામ લોકો સામે કાર્યાલયમાં જ ધરમપુર તાલુકા યુવા મોરચા પ્રમુખ નિખિલ ભંડારીએ દાદાગીરી કરી અપમાનિત કરતા સરપંચોએ નિખિલ ભંડારી સામે શિક્ષાત્મક પગલા ભરવાની ધારાસભ્યને લેખિત ફરીયાદ કરાઈ હતી.
વાસ્તવમાં ધરમપુર તાલુકાના સરપંચો, તાલુકા વિકાસ અધિકારી દ્વારા તલાટી પાસે 5 હજારની માંગ થઈ રહી હોવાનો આક્ષેપ છે. જેની રજૂઆત કરવા 45 ગામના સરપંચ અને તલાટી મંડળના સભ્યો ધારાસભ્ય અરવિંદ પટેલના જનસંપર્ક કાર્યાલયમાં આજે પહોંચ્યા હતા. ત્યારે તાલુકા યુવા મોરચાના પ્રમુખ નિખિલ ભંડારીએ રજૂઆત કરવા આવેલાઓ સામે દાદાગીરી શરૂ કરી હતી. નિખિલ ભંડારીએ લોકોને અપમાનિત કરી તમને અહીં કોણ બોલાવ્યા છે, જેવા શબ્દોનો પ્રયોગ કરતા 45 સરપંચ અને તલાટી મંડળના સભ્યોએ ધારાસભ્યને લેખિત રજૂઆત કરી નિખિલ ભંડારી સામે શિક્ષાત્મક પગલા ભરવાની માંગ કરી હતી.