(વર્તમાન પ્રવાહ ન્યુઝ નેટવર્ક)
દમણ, તા.03
સોમવાર તા.3જીજાન્યુઆરીના રોજ દાદરા નગર હવેલીના નરોલી ગ્રામ પંચાયતના ટાઉનહોલ ખાતે ‘સબકી યોજના, સબકા વિકાસ’ યોજના અંતર્ગત સરપંચની અધ્યક્ષતામાં ગ્રામસભાનું આયોજન કરવામાં આવ્યું હતું. આઝાદીના અમૃત મહોત્સવ અંતર્ગત ‘સબકી યોજના, સબકા વિકાસ’ના મુદ્દા પર અને ગ્રામ પંચાયતના વિકાસ યોજના જન યોજના અભિયાન સંદર્ભે સરપંચની અધ્યક્ષતામાં એક ગ્રામસભાનું આયોજન કરવામાં આવ્યું હતું. આ પ્રસંગે નરોલી ગ્રામ પંચાયતના વિકાસના સંદર્ભે વિવિધ યોજનાઓ અને મુદ્દાઓ અંગે ગહન ચર્ચા-વિચારણા કરવામાં આવી હતી. ગ્રામ સભામાં ઉપસ્થિત ગ્રામજનોને સરકારની વિવિધ યોજનાઓ અંગે અલગ અલગ વિભાગના અધિકારીઓ દ્વારા જાણકારી આપવામાં આવી હતી, સાથે નાણાંકીય વર્ષ 2021-22નો એક્શન પ્લાન બનાવવા માટે લેવામાં આવનાર કામોની યોજનાઓ અંગે ગ્રામસભામાં ઠરાવની મંજુરી મેળવી હતી. આ અવસરે સરપંચ ધર્મેશ પટેલ, પ્રભારી યોગેશસિંહ સોલંકી, જિલ્લા પંચાયત સભ્ય, નરોલી ગ્રામ પંચાયતના સભ્યો, સરકારી અધિકારીઓ સહિત ગ્રામજનો ઉપસ્થિત રહ્યા હતા.
