(વર્તમાન પ્રવાહ ન્યુઝ નેટવર્ક)
સેલવાસ,તા.10 : સેલવાસના સાંઈધામ સોસાયટીમાં રહેતી એક યુવતીએ કોઈક અગમ્ય કારણોસર પાંચમા માળેથી કૂદકો માર્યો હતો. જેમાં નીચે જોરદાર રીતે પટકાતા તેણીને ભારે ઈજાગ્રસ્ત થઈ હતી તેથી તાત્કાલિક સારવાર અર્થે હોસ્પિટલમાં ખસેડવામાં આવી હતી.
પ્રાપ્ત વિગત અનુસાર હિમાંશી જયસીંગ (ઉ.વ.23)એ કોઈક અગમ્ય કારણોસર સેલવાસના સાંઈધામ સોસાયટીના બિલ્ડિંગના પાંચમા માળેથી કુદકો મારી આત્મહત્યાનો પ્રયાસ કર્યો હતો. જેમાં હાથ અને પગમાં જ ઇજા થતાં ચમત્કારિક રીતે બચાવ થયો હતો. આ યુવતી નીચે પટકાતા સોસાયટીના લોકો દોડી આવ્યા હતા અને ઈજાગ્રસ્ત થયેલી યુવતીને સારવાર અર્થે સેલવાસની શ્રી વિનોબા ભાવે સિવિલ હોસ્પિટલમાં આઈ.સી.યુ.માં દાખલ કરવામાં આવી છે. આ યુવતીએ કયા કારણોસર આત્મહત્યાનો પ્રયાસ કર્યો છે એ જાણી શકાયું નથી. હિમાંશીએ કોલેજ સુધીનો અભ્યાસ પૂર્ણ કરી હાલમાં ઘરે જ પરિવાર સાથે રહે છે. આ ઘટના અંગેની ફરિયાદ નોંધી વધુતપાસ સેલવાસ પોલીસ કરી રહી છે.
