(વર્તમાન પ્રવાહ ન્યુઝ નેટવર્ક) દમણ, તા.17
રમતગમત વિભાગ દ્વારા આયોજિત મર્જર કપ ક્રિકેટ ટૂર્નામેન્ટમાં આજે એમ.પી.-11ની ટીમે દમણ જિલ્લા પંચાયતને 73 રનથી હરાવી સેમી ફાઇનલમાં પ્રવેશ કર્યો હતો. એમપી ઈલેવનના મયુર પટેલે તેના ઓલરાઉન્ડ પ્રદર્શન માટે મેન ઓફ ધ મેચનો એવોર્ડ આપવામાં આવ્યો હતો.
પ્રાપ્ત માહિતી અનુસાર સંઘપ્રદેશ દાદરા નગર હવેલી અને દમણ-દીવના વિલીનીકરણ દિવસ નિમિત્તે સ્વામી વિવેકાનંદ ક્રિકેટ ગ્રાઉન્ડ ખાતે દમણ રમતગમત વિભાગ દ્વારા આયોજિત બીજી મર્જર કપ ક્રિકેટ ટૂર્નામેન્ટમાં આજે એમપી ઈલેવન અને દમણ જિલ્લા વચ્ચે મેચ રમાઈ હતી. એમપી ઈલેવને ટોસ જીતી પ્રથમ બેટીંગ કરતા નિર્ધારીત ર0ઓવરમાં 182 રન બનાવ્યા હતા. લક્ષ્યાંકનો પીછો કરતા દમણ જિલ્લા પંચાયતની ટીમ 110 રનના સ્કોર પર સમેટાઈ ગઈ હતી. એમપી-11 માટે મયુર પટેલે 16 બોલમાં 40 રન બનાવ્યા હતા.
બીજી ઇનિંગમાં શાનદાર બોલિંગ કરી, 4 ઓવરમાં 19 રન આપીને 2 વિકેટ લીધી. દમણ જિલ્લા પંચાયત વતી ઉદય કનાસે 48 બોલમાં 55 રનની ઇનિંગ રમી હતી. દમણ જિલ્લા પંચાયત તરફથી બોલિંગમાં દેવેશ કટારાએ તેની 4 ઓવરમાં 26 રન આપીને 3 અને પ્રિન્સ યાદવે 4 ઓવરમાં 29 રન આપીને 2 વિકેટ ઝડપી હતી.
ઓલરાઉન્ડ પ્રદર્શન માટે મયુર પટેલને મદદનીશ શારીરિક શિક્ષણ અધિકારી શ્રી અક્ષય કોટલવાર દ્વારા મેન ઓફ ધ મેચનો એવોર્ડ આપી પ્રોત્સાહિત કરવામાં આવ્યા હતા.
