(વર્તમાન પ્રવાહ ન્યુઝ નેટવર્ક)
સેલવાસ, તા.26: દાદરા નગર હવેલી અને દમણ દીવ પ્રશાસન દ્વારા જ્યાં ‘સ્વચ્છતા ત્યાં પ્રભુતા’ સૂત્ર સાથે ‘સ્વચ્છ ભારત’ અભિયાન અંતર્ગત પ્રદેશના દરેક વિસ્તારને આવરી લેવામાં આવ્યા છે. જિલ્લા પંચાયત, સેલવાસ નગરપાલિકા અને દરેક પંચાયતમાં સ્વચ્છતા જાગૃતિ કાર્યક્રમો પૂરજોશમાં ચાલી રહ્યા છે અને લોકોને સ્વચ્છતા અંતર્ગત જરૂરી સુવિધાઓ ઉપલબ્ધ કરવામાં આવી રહી છે. દપાડા પંચાયત વિસ્તારમાં આવેલ પાટી ગામમાં પંચાયતનાકર્મચારીઓ અને પદાધિકારીઓ દ્વારા ગ્રામજનોને સ્વચ્છતા અંતર્ગત જાણકારી આપી સૂકો કચરો ભૂરા રંગના ડસ્ટબીનમાં અને ભીનો કચરો લીલા રંગના ડસ્ટબીનમાં જ નાંખવામાં આવે આ બાબતની દરેક ફળિયામાં ઘરે ઘરે જઈને વિતરણ કરવામાં આવ્યા હતા. ગ્રામજનો પણ પ્રશાસન દ્વારા લેવામાં આવી રહેલ કાળજીઓને લઈને ઉત્સાહમાં જોવા મળ્યા હતા. પંચાયત વિસ્તારમાં નિયમિત કચરો ભેગો લેવા માટે નવા ટ્રેક્ટરમાં તૈયાર કરવામાં આવેલ કચરાપેટીની સુવિધાઓ પણ ઉપલબ્ધ કરવામાં આવેલી છે. દપાડા ગામના સરપંચ શ્રી છગનભાઈ માહલા અને જિલ્લા પંચાયત સભ્ય શ્રી રમેશભાઈ માહલા અને પંચાયત સભ્યોના સાથ સહકારથી પંચાયત વિસ્તારના દરેક ફળિયામાં દાનહ અને દમણ દીવ પ્રશાસન દ્વારા ગ્રામજનોને સરકાર તરફથી મળતા લાભો અને દરેક યોજનાઓ અંગે માહિતગાર કરવામાં આવી રહ્યા છે. પંચાયત વિસ્તારમાં અંદાજીત સાત હજાર લીલા અને ભૂરા રંગના ડસ્ટબીન વિતરણ કરવામાં આવશે.
