(વર્તમાન પ્રવાહ ન્યુઝ નેટવર્ક)
પારડી, તા.06: પારડી પાર નદી નજદીક તારીખ 28.8.2022 ના રોજ એક બંધ મારુતિ બલેનો કારમાંથી યુવતીનો મૃતદેહ મળી આવ્યો હતો. તપાસ દરમ્યાન આ યુવતી વલસાડના સેગવી ખાતે રહેતી સિંગર વૈશાલી બલસારા હોવાનું અને 25 લાખ જેટલી મોટી રકમની લેણદેણમાં તેની જ મિત્ર બબીતા શર્માએ કોન્ટ્રાકટ કિલરો રોકી 8 લાખની સોપારી આપી તેની હત્યા કરી હોવાનું બહાર આવ્યું હતું.
પારડી પોલીસની સાથે વલસાડ જિલ્લાની એલસીબી, એસઓજી સહિત ખૂબ મોટી સંખ્યામાં પોલીસની ટીમ, સીસીટીવી કેમેરા, મોબાઈલ લોકેશન તથા અતિ આધુનિક સાધનોને લઈ પોલીસે ખૂબ ટૂંકા ગાળામાં આ હત્યાના કેસમાં સફળતા મેળવી છે.
આ હત્યા પાછળની માસ્ટર માઈન્ડ એવી વલસાડના વશિયર ખાતે રહેતી બબીતા શર્માને ખુબજ ટૂંકા ગાળામાં ઝડપ્યા બાદ મુખ્ય આરોપીઓ સુધી પહોંચી તેમને ઝડપવાના ચક્રો પોલીસે ગતિમાન કરી બબીતાના રિમાન્ડ મેળવી, ઓળખ પરેડ કરી તમામ પ્રયત્ન આદર્યા હતા. પરંતુ આ દરમિયાન બબીતા હાલ ગર્ભવતી હોય પોલીસે વધુ પડતી દયા અને સગવડ આપતા સાતીર એવી બબીતા જૂઠું બોલી પોલીસને પણરમાડી રહી છે પરંતુ પોલીસની શરૂઆતથી જ આ કેસ પ્રત્યેની મહેનત અને લગાવને લઈ આ હત્યા કેસના ત્રણ પૈકીના એક આરોપીને ઝડપી પાડવામાં સફળતા મળી છે.
પોલીસને ત્રણ પૈકીનો એક આરોપી ત્રિલોક સિંઘ પંજાબના લુધિયાણા ખાતે હોવાની બાતમી મળતા પંજાબ પોલીસની મદદ લઈ ત્રિલોક સિંઘને ઝડપી પાડયો હતો.