અજય પટેલ મોપેડ ઉપર ટી.વી. લઈને વાપી આવી રહેલો ત્યારે અકસ્માત સર્જાયો
(વર્તમાન પ્રવાહ વાપી બ્યુરો)
વાપી, તા.09: વાપી નેશનલ હાઈવે ઉપર બલીઠા અને સલવાવ નજીક આજે શુક્રવારે બપોરે દર્દનાક અકસ્માત સર્જાયો હતો. પારડીથી મોપેડ ઉપર વાપી આવવા નિકળેલા યુવાનનું મોપેડ કન્ટેનર સાથે ભટકાઈ જતા યુવાનના શરીર પર કન્ટેનરનું વ્હિલ ફરી વળતા યુવકનું ઘટના સ્થળે જ અરેરાટીભર્યુ મોત નિપજ્યું હતું.
પ્રાપ્ત વિગતો અનુસાર પારડી રહેતો અજય બી. પટેલ આજે શુક્રવારે તેની મોપેડ નં.જીજે 15 ડીએમ 9008 ઉપર સવાર થઈને વાપી આવવા નિકળ્યો હતો. મોપેડમાં ટીવી હતું. વાપી હાઈવે સલવાવ અને બલીઠા વચ્ચે કન્ટેનર નં.એમએચ 46 એએફ 2207ની સાથે મોપેડ ભટકાતા અજય ઉપર કન્ટેનરનું પાછળનું વ્હિલ ફરી વળ્યું હતું. જેમાં યુવાનના શરીરના ટુકડા થઈ જતા ઘટના સ્થળે જ દર્દનાક મોત નિપજ્યું હતું. વાપી પોલીસે લાશનો કબજો લઈ પી.એમ. માટે મોકલી આપી હતી.
