બીજી તરફ માંગણી માટે વલસાડ આશ્રમ શાળાના કર્મચારીઓએ સી.બી. દેસાઈ હાઈસ્કૂલના મેદાનમાં પ્રતિક ધરણા કર્યા
(વર્તમાન પ્રવાહ વાપી બ્યુરો)
વાપી, તા.22: વલસાડ જિલ્લા સહિત ગુજરાત ભરમાં આંદોલનની ભરપુર સિઝન ચાલી રહી છે. વિવિધ યુનિયન, તબીબો, એસ.ટી. કર્મચારી, શિક્ષકો, રેવન્યુકર્મચારીઓ પોતાની પડતર માંગણીઓ ઉપર સરકાર સામે આંદોલનનો મોરચો કરી રહ્યા છે તે અંતર્ગત આજે વલસાડમાં બે-બે આંદોલનની સમાંતર ઘટનાઓ ઘટી હતી. આશાવર્કર અને ફેસેલીટર બહેનો હડતાલ ઉપર ઉતરી હતી તો બીજી તરફ જિલ્લા આશ્રમ શાળાના કર્મચારીઓએ પણ પ્રતિક ધરણા કરી માંગણીઓ માટે દેખાવો યોજ્યા હતા.
વલસાડ જિલ્લા પંચાયત પાસે મહિલા શક્તિ સેનાના નેજા હેઠળ આશાવર્કર બહેનો અને ફેસેલીટર બહેનો તેમની પડતર માંગણીઓ માટે જિલ્લા પંચાયત નજીક અચોક્કસ મુદતની હડતાલ ઉપર ઉતરી હતી. તેમની મુખ્ય માંગણીઓમાં ફીક્સ પગાર અને લઘુત્તમ વેતનની છે. સાથે સાથે આજે તેમણે ચિમકી પણ ઉચ્ચારી હતી કે હોસ્પિટલોમાં કોઈ બાબત બને તેની અમારી જવાબદારી રહેશે નહીં, તે પ્રમાણે વલસાડ જિલ્લા આશ્રમ શાળા કર્મચારી સંઘના શૈક્ષણિક, બિન શૈક્ષણિક કર્મચારીઓ પણ સી.બી. હાઈસ્કૂલના મેદાનમાં રાજ્ય સ્તરના આંદોલનને ટેકો આપવા તેમજ પડતર માંગણીઓના સમાધાન નિકાલ માટે પ્રતિક ઉપવાસ ઉપર ઉતર્યા હતા.
