પર્યાવરણને બચાવવા માટે કોમ્પ્યુટર, મોબાઈલ-ટી.વી.નો વેસ્ટ સતત એક મહિના સુધી ક્લબ દ્વારા ડોર ટુ ડોર કલેકશન કરાશે
(વર્તમાન પ્રવાહ વાપી બ્યુરો)
વાપી, તા.20: પર્યાવરણ અનેક રીતે નુકશાન ગ્રસ્ત થઈ રહ્યું છે. તેમાં નવો વધારો 21મી સદીમાં એ થયો છે કે દેશભરમાં ઈ-વેસ્ટનો ભંગાર મોટા પ્રમાણમાં ખડકાઈ રહ્યો છે. આ ઈ-વેસ્ટના નિકાલની ઝુંબેશ વાપી લાયન્સ ક્લબ ઈન્ટરનેસનલ દ્વારા હાથ ધરાઈ છે. વાપીના વિવિધ વિસ્તારોમાં ક્લબ દ્વારા ડોર ટુ ડોર ફરીને ઈ-વેસ્ટ કલેકશનની કામગીરી આરંભાઈ છે. આ કામગીરી સતત એક મહિનો કાર્યરત રહેશે.
પર્યાવરણને ઈ-વેસ્ટ પણ નુકશાન પહોંચાડી રહ્યો છે. દેશ-વિદેશમાં ઈ-વેસ્ટના યોગ્ય નિકાલની કાર્યવાહી થઈ રહી છે. તેથી વાપી લાયન્સ ક્લબ દ્વારા વાપી વિસ્તારમાં ઈ-વેસ્ટ ભેગો કરવાની ઝુંબેશનો ગુરુવારથી પ્રારંભ કરાયો છે. મે. હિન્દુસ્તાન ઈ-વેસ્ટ મેનેજમેન્ટના સહયોગથી ચાલી રહેલી આ કામગીરીનો એકત્ર વેસ્ટ કંપનીને આપી દેવામાં આવશે. કંપની તેનું રિસાઈક્લીંગ કરશે અથવા તો યોગ્ય રીતે નાશ કરશે. તેથી વાપી વિસ્તારમાં ઓફીસ-રેસિડેન્ટમાં ટી.વી., મોબાઈલ, લેપટોપ, જેવા બંધ ઈલેક્ટ્રોનિક્સ સામાનનું કલેકશન લાયન્સ ક્લબ દ્વારા કરવામાં આવી રહ્યું છે. આ ડ્રાઈવ સતત એકમહિનો ચાલનારી છે. ડિસ્ટ્રીક્ટ ગવર્નર મુકેશભાઈ પટેલ અને ક્લબના હોદ્દેદારો આ ઝુંબેશ ચલાવી રહ્યા છે.
