વલસાડ અને ધરમપુરની ફાયર બ્રિગેડની ટીમે સમયસર પહોંચી આગ પર કાબૂ મેળવતા લોકોએ લીધો રાહતનો દમ
(વર્તમાન પ્રવાહ ન્યુઝ નેટવર્ક)
પારડી, તા.21: વલસાડ તાલુકાના દુલસાડ ગામેથી સુકુ ઘાસ ભરી આઈસર ટેમ્પો નંબર જીજે 15 યુયુ 8751 પસાર થઈ રહ્યો હતો. તે દરમિયાન વીજ તાર અડી જતા તારમાંથી ઉડેલા તણખા ને લઈ સુકું ઘાસ ભરેલા ટેમ્પામાં અચાનક આગ લાગી ગઈ હતી. આ આગને લઈ રસ્તા પરથી પસાર થતા તથા આજુબાજુ રહેતા લોકોમાં ભયનો માહોલ ફેલાયો હતો. ટેમ્પામાં આગ લાગી હોવાનું ટેમ્પા ચાલકને જાણ થતા કોઈને નુકસાન ન થાય તેની કાળજી રાખી તેણે તાત્કાલિક ટેમ્પાને દુલસાડ ગામના સિંધી ફળિયામાં ખાલી જગ્યામાં રોડની સાઈડે ટેમ્પો ઉભો રાખી આગ અંગે વલસાડ અને ધરમપુર નગરપાલિકા ફાયર બ્રિગેડની ટીમને જાણ કરતા ગણતરીની મિનિટોમાં ફાયર બ્રિગેડના બે ફાયર ફાઈટરોની ટીમ દોડી આવી પાણીનો મારો ચલાવી આગને કાબુમાં લેતા સ્થાનિકોએ હાશકારો લીધો હતો. આગની ઘટનાની જાણ વલસાડરૂરલ પોલીસને થતા તેઓ પણ સ્થળ પર દોડી ગઈ હતી. આ ઘટના અંગે વલસાડ રૂરલ પોલીસ મથકમાં જાણવાજોગ ફરિયાદ નોંધવા પામી છે.
