હાઈવે જુની આર.ટી.ઓ. ઓફિસ કમ્પાઉન્ડમાં એસ.ટી. ડેપોની કામગીરી ચાલી રહી છે
(વર્તમાન પ્રવાહ વાપી બ્યુરો)
વાપી, તા.21: વાપી રેલવે ફલાય ઓવરબ્રિજ તોડી પાડીને નવિન પુલ બનાવવાની કામગીરીના ચક્રો ગતિમાન થઈ ચુક્યા છે તે સંદર્ભે વાપી એસ.ટી. ડેપોનું પણ કામ ચલાઉ સ્થળાંતર કરવાની નોબત ઉભી થઈ છે ત્યારે વહિવટી તંત્ર દ્વારા વાપી નેશનલ હાઈવે જુની આર.ટી.ઓ. કચેરીની જગ્યામાં કામ ચલાઉ એસ.ટી. ડેપો બનાવવાની કામગીરી પુરજોશમાં આરંભી દીધી છે.
વાપીમાં આગામી દોઢ-બે વર્ષમાં રેલવે ફલાય ઓવરબ્રિજ નવિનબનાવાનો હોવાથી ઘણી બધી ઉથલ-પાથલ સર્જાવાની ચાલુ થઈ જશે. કારણ કે વાપીના ટ્રાફિક હાર્ટલાઈન સમો રેલવેનો પુલ ધ્વંશ થવાનો હોવાથી મોટી સમસ્યા પૂર્વથી પશ્ચિમ ટ્રાફિક અવર-જવરની ઉભી થવાની જ છે. તે માટે વૈકલ્પિક ધોરણે ટ્રાફિક નિયંત્રિત કરવાના માર્ગોની ગોઠવણી કરી છે પરંતુ એ ખુબ કષ્ટદાયક અને અસુવિધાજનક સાબિત થનાર છે. તેવી જ સીધી આડઅસર વાપી એસ.ટી. ડેપો થકી ઉભી થનારી છે. ડેપોનું કામ ચલાઉ સ્થળાંતર હાઈવે જુની આર.ટી.ઓ. કચેરી ખાતે થનાર છે તેથી હાઈવે સર્વિસ રોડો પણ જામ થશે એ નક્કી છે. પરંતુ ઉભી થનાર પરિસ્થિતિનો બે વર્ષ સુધી સામનો કરવા સિવાય વાપી વાસીઓને છુટકો નથી.
