1 અને 14ની નકલ માટે કાગળ ઉપર લખેલી અરજી બંધ કરવાનો મામલતદાર કાર્યાલય દ્વારા લેવાયેલો નિર્ણય
(વર્તમાન પ્રવાહ ન્યુઝ નેટવર્ક)
દમણ, તા.03 : સંઘપ્રદેશ દાદરા નગર હવેલી અને દમણ-દીવના પ્રશાસક શ્રી પ્રફુલભાઈ પટેલના માર્ગદર્શન અને દિશા-દોરવણી હેઠળ દમણ જિલ્લા પ્રશાસને જનતાને તમામ સરકારી સુવિધાઓ આજની ડિજિટલ ટેક્નીકના માધ્યમથી ઘરબેઠા મળી શકે તે પ્રકારની વ્યવસ્થા માટે મહત્વપૂર્ણ ઉપલબ્ધિ હાંસલ થઈ છે.
ડિજિટલ ઈન્ડિયા અભિયાનઅંતર્ગત મામલતદાર કાર્યાલય દમણ દ્વારા હવેથી 1 અને 14ની નકલ સંપૂર્ણ રીતે ડિજિટલના માધ્યમથી જારી કરાશે. જેમને 1 અને 14ની નકલ જોઈતી હશે તેઓએ સુગમ પોર્ટલ ઉપર અરજી કરી અને જરૂરી ફીનું કાર્ડ, યુપીઆઈ અને નેટ બેંકિંગ દ્વારા ચૂકવણી કરી 1 અને 14ની નકલ માટે પોતાની અરજી જમા કરી શકે છે. આ 1 અને 14ની નકલ ફેસીમાઈલ હસ્તાક્ષર સાથે જારી કરાશે. ડિજિટલી જારી કરાયેલ 1 અને 14ની નકલનું સત્યાપન ક્યુઆર કોડ, બારકોડ તથા ફોર્મ 1 અને 14ની નકલમાં આપવામાં આવેલ પોર્ટલના લિંક દ્વારા કરી શકાશે. આ 1 અને 14ની નકલને અરજકર્તાના ડિજિ લોકર સાથે પણ જોડી શકાય છે.
હવેથી 1 અને 14ની નકલ માટે કાગળ ઉપર લખી અરજી કરવાની પ્રથા તાત્કાલિક પ્રભાવથી બંધ કરવામાં આવી છે અને હવે 1 અને 14ની નકલ ડિજિટલ માધ્યમથી જ મળી શકશે તેની નોંધ લેવા પણ દમણના મામલતદાર શ્રી સાગર ઠક્કરે એક અખબારી યાદીમાં જણાવ્યું છે.
