(વર્તમાન પ્રવાહન્યુઝ નેટવર્ક)
વલસાડ, તા.12: વિદ્યાર્થીઓના સર્વાંગી વિકાસની કેડી કંડારવા સતત પ્રયત્નશીલ, સમગ્ર વર્ષ દરમ્યાન થતી વિવિધ પ્રવૃત્તિઓના ભાગરૂપે કુસુમ વિદ્યાલયમાં તા.12મી જાન્યુઆરી ગુરૂવારના રોજ સવારે શાળા સમય દરમિયાન ઉત્તરાયણ તહેવારની ઉજવણી કરવામાં આવી હતી. આ પ્રસંગે સવારે દરેક વર્ગમાં શિક્ષકોએ વિદ્યાર્થીઓને ઉત્તરાયણના તહેવારનું મહત્વ સમાવ્યું હતું. સવિશેષ પતંગ ઊડાડતી વખતે રાખવામાં આવતી સાવધાની, કાળજી અને સંભાળ માટે પણ સમજાવવામાં આવ્યું હતું. રસ્તે ચાલતા દોરીથી સાવધાન રહેવા બાબતે પણ વિશેષ દરકાર લેવા બાબત સવિસ્તાર સમજાવ્યું હતું. વિદ્યાર્થીઓએ અમો ચાઈનીઝ તુકકલ કે દોરીનો ઉપયોગ કરીશું નહિ અને કરવા દઈશું નહી આવો સંકલ્પ કર્યો હતો. વિદ્યાર્થીઓ પતંગ અને દોરી લઈને આવ્યા હતા. શાળાના પટાંગણમાં વિદ્યાર્થીઓએ સંગીતને સથવારે પતંગ ઉડાવવાની મજા માણી હતી. આકાશ રંગબેરંગી પતંગોથી ભરાઈ ગયું હતું. વિશેષ પતંગના ગીતોએ અને વિદ્યાર્થીઓના પતંગ ઉડાડવાના પ્રયત્નોએ આ પર્વમાં ખૂબ જ સરસ આકર્ષણ જમાવ્યું હતું. શાળાનું મેદાન ‘કાયપો છે’ ના નારાથી ગે0જી ઉઠ્યું હતું. બાદમાં બધા વિદ્યાર્થીઓને તલના લાડુ આપવામાં આવ્યા હતા. દરેક વિદ્યાર્થીઓએ ઉત્તરાયણ આનંદ ઉત્સાહથી મજામાણી હતી.
