અનિયમિત પગાર મળતા કર્મચારીઓ હડતાલ પર ઉતર્યા : બે દિવસમાં પગાર નહી થાય તો અચોક્કસ મુદતની હડતાલની ચિમકી
(વર્તમાન પ્રવાહ વાપી બ્યુરો)
વાપી, તા.24: વલસાડ સિવિલ હોસ્પિટલમાં ખાનગી સિક્યોરિટી દ્વારા સિક્યોરિટીનું કામકાજ ચલાવાઈ રહ્યું છે પરંતુ ખાનગી એજન્સી સમયસર પગાર નહી આપતા સુરક્ષા કર્મચારીઓએ આજે હડતાલ પાડી હતી.
વલસાડ સિવિલ હોસ્પિટલની સિક્યોરિટી સુરતની એમ.કે. સિક્યોરિટી નામની એજન્સી ચલાવી રહી છે. એજન્સી તરફથી સિક્યોરિટી કર્મચારીઓનું બે-બે મહિના સુધી પસાર માટે લટકાવાઈ રહ્યા છે તેથી સિક્યોરિટીકર્મચારી આર્થિક પારાવાર મુશ્કેલીઓ વેઠી રહ્યા હોવાથી અંતે આજે 55 જેટલા સિક્યોરિટી કર્મચારી અચાનક હડતાલ પર ઉતરી ગયા હતા તેમજ જો બે દિવસમાં પગાર નહી ચુકવાય તો અચોક્કસ મુદતની હડતાલ પાડીશું તેવું કર્મચારીઓએ જણાવ્યું છે. બીજી તરફ કર્મચારીઓ દ્વારા હડતાલનું રણશીંગુ ફુંકતાની સાથે જ એજન્સીએ બે દિવસમાં પગાર ચૂકવી દેવાનું જાહેર કર્યું હોવાનું જાણવા મળ્યું છે.