અધિકારીઓએ યુનિટવિઝીટ, સીઈટીપી લાઈન,
ડ્રેનેજ કનેકશનની તપાસ હાથ ધરી
(વર્તમાન પ્રવાહ વાપી બ્યુરો)
વાપી, તા.21: વાપી જીપીસીબીને મળેલી ફરિયાદ બાદ વાપીની વિવિધ કંપનીઓમાં ચેકીંગની કામગીરી હાથ ધરાઈ હતી. વિવિધ કંપનીના સેમ્પલ કલેક્ટર કરીને ગાંધીનગર વડી કચેરીએ મોકલાવાયા છે.
હાલમાં વરસાદની સિઝન ચાલી રહી છે ત્યારે કેટલીક કંપનીઓ દ્વારા પ્રદૂષિત પાણી છોડવામાં આવી રહ્યાના અહેવાલો બાદ જીપીસીબીએ એકશન શરૂ કરી છે. જીઆઈડીસી થર્ડ ફેઈઝ સ્થિત આવેલ હેમા ડાયકેમ નામની કંપનીમાં સેમ્પલ કલેક્ટર કરાયા હતા તેની સાથે સાથે અન્ય કંપનીઓમાં પણ રૂટીન ચેકીંગ, સીઈટીપી લાઈન, ડ્રેનેજ કનેકશન વિગેરે બાબતોની ઝીણવટભરી તપાસ હાથ ધરી હતી. છેલ્લા એક સપ્તાહથી લગાતાર કામગીરી જી.પી.સી.બી. દ્વારા થઈ રહી છે. જો કે ઘોડા છૂટી ગયા બાદ તબેલાને તાળા મારવા જેવી આ કામગીરીને અંતે સબ સલામત હોવાનો રાગ જ આલાપવામાં આવશે. જી.પી.સી.બી. ગમે તેમ દોડધામ કરે પણ હજુ સુધી પ્રદૂષિત પાણી ઠાલવવાની કામગીરી ક્યાંક ને ક્યાંક ચાલી રહી હોય તેમ જણાઈ રહ્યું છે.
