અધિક જિલ્લા મેજીસ્ટ્રેટ ડૉ. વિવેક કુમારની ઉપસ્થિતિમાં તમામ સરકારી વાહનો, ઓટો રિક્ષા, ટેક્સી અને રાજ્ય પરિવહન બસોના ડ્રાઈવરોને તાલીમ આપી એનાયત કરાયા પ્રમાણપત્રો
(વર્તમાન પ્રવાહ ન્યુઝ નેટવર્ક)
દીવ, તા.03 : પરિવહન વિભાગ, દીવ દ્વારા વેસ્ટર્ન ઈન્ડિયા ઓટોમોબાઈલ એસોસિએશનના સહયોગથી આજે સવારે 10:30 વાગ્યે મલાલા ઓડિટોરિયમ-દીવ ખાતે તમામ સરકારી વાહનો, ઓટો રિક્ષા, ટેક્સી અને રાજ્ય પરિવહન બસોના ડ્રાઈવરો માટે ‘સલામત ડ્રાઇવિંગ’ અને ‘માર્ગ સલામતી કૌશલ્ય’ની તાલીમ કાર્યક્રમનું આયોજન કરવામાં આવ્યું હતું.
આ પ્રસંગે કાર્યક્રમના મુખ્ય અતિથિ તરીકે અધિક જિલ્લા મેજીસ્ટ્રેટ ડૉ. વિવેક કુમાર ઉપસ્થિત રહ્યા હતા. તાલીમ કાર્યક્રમની શરૂઆત મુખ્ય અતિથિ તરીકે ઉપસ્થિત રહેલા અધિક જિલ્લા મેજીસ્ટ્રેટ ડૉ. વિવેક કુમારના હસ્તે દીપ પ્રાગટ્યથી કરવામાં આવી હતી. ત્યારબાદ ઉપસ્થિત તમામ મહેમાનોનું પુષ્પગુચ્છથી સ્વાગત કરવામાં આવ્યું હતું.
અત્રે આયોજીત તાલીમનો ઉદ્દેશ્ય મુસાફરો, રાહદારીઓ અને સાથી માર્ગ વપરાશકર્તાઓની સલામતી સુનિﾍતિ કરવા માટે દીવ જિલ્લાના ડ્રાઇવરોને જરૂરીજ્ઞાન અને કૌશલ્યથી સજ્જ કરવાનો હતો, જેથી માર્ગ અકસ્માતો અસરકારક રીતે ઘટાડી શકાય અને તમામ ડ્રાઈવરો વધુ સારી રીતે તૈયાર થઈ શકે અને રસ્તા પર પડકારરૂપ અને કટોકટીની પરિસ્થિતિઓનો સામનો કરી શકે.
આ તાલીમમાં ભાગ લેનારા તમામ ડ્રાઈવરોએ તેમના ડ્રાઇવિંગ લાયસન્સની અસલ અને નકલ બંને સાથે લાવવાની જરૂર હતી. તાલીમ મેળવનાર ડ્રાઇવરોને ઉપસ્થિત અધિકારીઓ દ્વારા પ્રમાણપત્રોનું વિતરણ પણ કરવામાં આવ્યું હતું.
આ અવસરે નાયબ કલેક્ટર શ્રી શિવમ મિશ્રા, સબ ડિવિઝનલ પોલીસ ઓફિસર શ્રી સંદીપ રૂપેલા, અધિક્ષક કલેક્ટર શ્રી ડી.બી.આહીર, ટ્રાફિક ઇન્ચાર્જ શ્રી આર.કે.ગાંવિત અને મદદનીશ મોટર વાહન નિરીક્ષક શ્રી અભિનવ પટેલ સહિત 200 જેટલા લાભાર્થીઓ ડ્રાઈવરો ઉપસ્થિત રહ્યા હતા.
