(વર્તમાન પ્રવાહ ન્યુઝ નેટવર્ક)
પારડી, તા.26: કરમબિલીના નાહુલી મોહનગામથી શેરડી ભરીને એક ટ્રેક્ટર નંબર જીજે-30- 3634 જેનો ટ્રેલર નં.જીજે-15-વીવી-0795 વલસાડ સુગર ફેક્ટરી તરફ આજે શનિવારના રોજ જઈ રહ્યું હતું. આ દરમ્યાન પારડી હાઈવે સ્થિત આવેલ વલ્લભ આશ્રમ સ્કૂલ પાસેના બ્રિજ પર મુંબઈથી અમદાવાદ જતા નેશનલ હાઈવે પર અચાનક ટ્રેક્ટર ચાલકે સ્ટેરિંગ પરથી કાબુ ગુમાવતા શેરડી ભરેલ ટ્રેલર હાઈવેના વચોવચ પર પલટી મારી ગયું હતું. ટ્રેલર પલટી મારતા શેરડીનો જથ્થો હાઈવે પર ફેલાય જતા હાઈવે સંપૂર્ણ બ્લોક થઈ ગયો હતો જેને લઈ સર્વિસ રોડથી વાહનો પસાર થતા લાંબા સમય સુધી હાઈવે પર ટ્રાફિક જામના દ્રશ્યો સર્જાયા હતા. બનાવની જાણ થતા જ પારડી પોલીસ અને જિલ્લા હાઇવે ટ્રાફિક પોલીસની ટીમ પણ સ્થળ પર પહોંચી વાહન વ્યવહારને ખુલ્લો કરવાના પ્રયાસ હાથ ધર્યા હતા.
ટ્રેક્ટરનું ટ્રેલર જે સમયે પલટી માર્યું બરાબર એ જ સમયે પાછળ આવી રહેલ એક બાઇક ચાલક પોતાની મોટર સાયકલ નં.જીજે-15-બીએસ-8194 લઈ ત્યાંથી પસાર થતા શેરડીના જથ્થા સાથે અથડાઈ રસ્તા પર પટકાયા હતા પરંતુ ફકત નાની મોટી ઈજા સાથે તેમનો ચમત્કારિક બચાવ થયોહતો.
