ગંભીર રીતે ઘાયલ થયેલ મોટર સાયકલ સવારને વલસાડ હોસ્પિટલમાં ખસેડાયો
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.05: ચીખલી-વાંસદા રાજ્યધોરી માર્ગ ઉપર માણેકપોર પાસે એક અર્ટિગા કાર ચાલકે કાબુ ગુમાવતા મોટર સાયકલને અડફેટે લીધા બાદ કાર મેડિકલ સ્ટોરના ઓટલા પર ચઢી જતા ભારે અફરા તફરી મચી જવા પામી હતી.
પ્રાપ્ત માહિતી અનુસાર સાંજના સમયે સાદડવેલ ગામના વાંઝરી ફળિયા ખાતે રહેતા મંગુભાઈ તેમની બજાર મોટર સાયકલ નં.જીજે-21-એચ-3357 પર ઘરે જઈ રહ્યા હતા તે દરમિયાન ચીખલી- વાંસદા રાજ્યધોરી માર્ગ ઉપર માણેકપોર પાસેના ચાર રસ્તા પાસે વળવા જતા વાંસદા તરફથી પુરપાટ ઝડપે આવી રહેલ મારૂતિ અર્ટિગા કાર નં.જીજે-30-એ-2609ના ચાલકે સ્ટેરિંગ પરનો કાબુ ગુમાવતા મોટર સાયકલને અડફેટે લીધા બાદ કાર મેડિકલ સ્ટોરના ઓટલા પર ચઢી જઈ શટર સાથે ધડાકાભેર અથડાતા આસપાસમાં હાજર લોકોમાં ભારે અફરા તફરી મચી જવા પામી હતી અને મેડિકલ સ્ટોરને પણ ભારે નુકસાન સાથે દુકાનનું શટર પણ તૂટી જવા પામ્યું હતું.
બીજી તરફ મોટર સાયકલ સવાર મંગુભાઈને શરીરે ગંભીર ઈજા થતાં 108ની મદદે સારવાર અર્થે વલસાડ સિવિલ હોસ્પિટલમાં ખસેડવામાં આવ્યા હતા. વધુમાં કાર ચાલક પણ ડરી જતા પોલીસ મથકે હાજર થઈગયો હતો. પોલીસે ઘટના સ્થળે પહોંચી તપાસ હાથ ધરી હતી. જોકે આ લખાય ત્યાં સુધી પોલીસ ચોપડે ગુનો નોંધાયો ન હતો. પરંતુ મોટર સાયકલ ચાલક માણેકપોર પાટીયા પાસે વળવા જતા તેને બચાવવામાં કાર ચાલક સફળ ન રહેતા અકસ્માત સર્જાયો હતો કે કેમ? તે પોલીસ તપાસ બાદ જ હકીકત બહાર આવશે.
