તાજેતરમાં સરકારે જાહેર કરેલ કૃષિ પેકેજ સહાયમાં 13 જિલ્લા, 48 તાલુકાનો સમાવેશ : વલસાડ જિલ્લો બાકાત
(વર્તમાન પ્રવાહ વાપી બ્યુરો)
વાપી, તા.08: ચાલુ વર્ષ જગતના તાત મોટા આફતનું વર્ષ બની રહેલ છે. વારે તહેવારે છાશવારે કમોસમી વરસાદ-માવઠાનો માર વલસાડ જિલ્લામાં સતત રહ્યો છે. પરિણામે બાગાયત ખેતી, અનાજ, કઠોર, શાકભાજી જેવા પાકોનું પારાવાર નુકશાન થયું છે. જેથી વલસાડ જિલ્લાના ખેડૂતો પણ કુદરતી પ્રકોપના ભોગ બન્યા છે. કમનસીબી ગણો કે સરકારની આડોડાઈ ગણો તાજેતરમાં સરકારે જાહેર કરેલ કૃષિ પેકેજ સહાયમાં વલસાડ જિલ્લાના બાકાત કરવામાં આવતા જિલ્લાના ખેડૂતોમાં વ્યાપક રોષ ફેલાયો છે.
ટાઢ, તડકામાં કાળી મજુરી કરતા ખેડૂતો માટે ચાલુ વર્ષના કમોસમી વરસાદ માવઠા પાયમાલી તાણી લાવેલ છે. ખેડૂતોને આશા હતી કે સરકાર રાહત પેકેજ આપશે પરંતુ તાજેતરમાં સરકારે જાહેર કરેલ કૃષિ પેકેજસહાયમાં 13 જિલ્લા 48 તાલુકાનો સમાવેશ કરાયો છે. વલસાડ જિલ્લાનો છેદ ઉડાવી દેવાયો છે. બાકાત જાહેર કરાયો છે. પરિણામે જિલ્લાના ખેડૂતો સાથે સરકારે ભારોભાર અન્યાય કર્યાની સ્થિતિ ઉભી થવા પામી છે. તેથી ધરમપુર તા.પંચાયતના અપક્ષ સભ્ય કલ્પેશ પટેલે મુખ્યમંત્રી જોગ લેખિત રજૂઆત કરીને માંગણી કરી છે કે ગ્રામ સેવકો દ્વારા ધરમપુર તાલુકામાં કરાયેલ પ્રાથમિક સર્વેનો રિપોર્ટ મંજૂર કરીને ખેડૂતોને આર્થિક સહાય આપવાની માંગણી કરી છે.