કસ્ટમ રોડ કોળીવાડમાં અકસ્માતસર્જાયો : પાંચ યુવક ઘાયલ
(વર્તમાન પ્રવાહ વાપી બ્યુરો)
વાપી, તા.19: આજની યુવાનીને બેફામ ડ્રાઈવિંગનો જાણે ચસકો લાગ્યો હોય તેમ વાહન બેફામ ચલાવીને અકસ્માત સર્જતા હોય છે. પરિણામે પોતે અને પરિવારને મુશ્કેલીમાં મુકતા હોય છે. કંઈક તેવી ઘટના વાપી બલીઠા કસ્ટમ રોડ કોળીવાડમાં સર્જાઈ હતી. ચાલુ કારમાં મોબાઈલમાં સ્નેપચેટ ઉપર વિડીયો બનાવી રહેલ યુવકે સ્ટેયરીંગ ઉપર કાબુ ગુમાવતા કાર હવામાં છ ફૂટ ઉછળીને પલટી મારી ગઈ હતી. ગંભીર અકસ્માતમાં પાંચ યુવકો ઘાયલ થયા હતા.
ગતરોજ વાપી બલીઠો કસ્ટમ રોડ કોળીવાડ વિસ્તારમાં કારમાં સવાર થઈ ચાર-પાંચ છેલબટાઉ યુવાનો બેફામ કાર હંકારી રહ્યા હતા તે દરમિયાન સોશિયલ મિડિયા માટે કાર ચાલક યુવાને ચાલુ કારમાં સ્નેપ ચેટ પર વિડીયો બનાવવા જતા ડ્રાઈવિંગ પર કાબુ ગુમાવતા કાર એક કમ્પાઉન્ડમાં છ ફૂટ ઉછળી પટકાઈ હતી. જેમાં કાર નં.જીજે 15 સી.કે. 4659 નો ખુરદો બોલાઈ ગયો હતો. અકસ્માતમાં સવાર પાંચ યુવાનો ઘાયલ થયા હતા. સ્થાનિકો એકઠા થઈ જતા તમામ ઘાયલોને 108 દ્વારા સારવાર માટે ખસેડાયા હતા. સદ્દનસીબે અકસ્માતમાં જાનહાની ટળી હતી.
