હજીરાથી ટેન્કર નં.જીજે 12 ઝેડ 4767 જ્વલનશીલ કેમિકલ ભરી દમણ જઈ રહ્યું હતું
(વર્તમાન પ્રવાહ વાપી બ્યુરો)
વાપી, તા.06: ઉદવાડા રેલવે ફાટક બંધ હોવાથી આજે મંગળવારે મળસ્કે એક કેમિકલ ભરેલ ટેન્કર થોભ્યુ હતું તે દરમિયાન અચાનક ટેન્કરમાં આગ લાગતા જ જ્વલનશિલ કેમિકલ ભર્યું હોવાથી આગે વિકરાળ સ્વરૂપ ધારણ કરી દેતા આજુબાજુમાં દોડધામ મચી જવા પામી હતી.
સુરત હજીરાથી જ્વલનશીલ કેમિકલ ભરીને ટેન્કર નં.જીજે 12 ઝેડ 4767 આજે મંગળવારે દમણ જવા નિકળ્યું હતું ત્યારે વહેલી સવારે ઉદવાડા ફાટક બંધ હોવાથી ટેન્કર ફાટક આગળ ઉભુ રહ્યું હતું તે સમયે અચાનક ટેન્કરમાં ભિષણ આગ લાગી હતી. જ્વલનશીલ કેમિકલ હોવાથી આગે ભિષણ વિકરાળ સ્વરૂપ જોતજોતામાં પકડી લીધું હતું. ઘટનાની જાણ વલસાડ, પારડી, વાપી ફાયર બ્રિગેડને કરાતા ચાર ફાયરની ગાડીઓ ઘટના સ્થળે ધસી આવી હતી. ફાયર બ્રિગેડએ કલાકની જહેમત બાદ આગ ઉપર કાબુ કરી લેવાયો હતો. જો કે આગ ફેલાતા જ ડ્રાઈવર-ક્લીનરબહાર નિકળી ગયા હોવાથી કોઈને ઈજા કે જાનહાની થવા પામી નહોતી. આગથી આજુબાજુના વિસ્તારમાં ભારે દોડધામ મચી ગઈ હતી. આગ બુઝાયા બાદ લોકોએ રાહતનો શ્વાસ લીધો હતો. આગને કારણે રેલવે વહેવારને અસર પહોંચી નહોતી. અંતે ક્રેઈન વડે બળીને ખાખ થઈ ગયેલ ટેન્કરને હટાવાયું હતું.