વાપીમાં રખડતા ઢોરની પારાવાર સમસ્યા શહેરીજનો માટે આફતરૂપ બની રહી છે
(વર્તમાન પ્રવાહ વાપી બ્યુરો)
વાપી, તા.09: વાપી વિસ્તારમાં રખડતા ઢોરોની સમસ્યા માજામુકી રહી છે. આજે એવા રખડતા ઢોરના એક ટોળાએ ગુંજન વિસ્તારમાં જાહેર રોડ ઉપર રેસ લગાવતા એક તબક્કે ભયનો માહોલ છવાઈ ગયો હતો.
વાપીમાં રખડતા ઢોરોની સમસ્યા સામે નોટિફાઈડ અને પાલિકા નજર અંદાજ કરી રહેલ છે. વાપી ટાઉનમાં બલીઠા હાઈવે સર્વિસ રોડ કે ગુંજન વિસ્તારમાં રખડતા ઢોર અડિંગા લગાવી જ્યાં ત્યાં બેસી રહ્યાની સામાન્ય વાત બની ગયેલ છે. જાહેર ટ્રાફિકને અડચણરૂપ બનતા ઢોરો માટે પાલિકા ક્યારેક ક્યારેક કામ ચલાઉ કાર્યવાહી કરતી જોવા મળે છે પણ સમસ્યાના કાયમી અંતે માટે કોઈ ઠોસ પગલા ભરાતા નથી. આજે મંગળવારે બપોરે એવા રખડતા ઢોરોનું એક ટોળુ ગુંજન પોલીસ ચોકીથી અંબામાતા સર્કલ રોડ ઉપર પુછડા ઊંચા કરી રેસ લગાવી હતી તેથી વાહન ચાલકો ભયભીત બની ગયા હતા. ક્યારેક આવા ઢોર મોટો અકસ્માત કે જાનહાની સર્જી શકે તેવુ કહેવુ જરાપણ ખોટું નથી. વાપી હાઈવે ઉપર બલીઠાના અસંખ્ય ઢોર સર્વિસ રોડ ઉપર સવાર-સાંજ ટોળે ટોળા નિકળે છે. પરિણામે ટ્રાફિક સમસ્યા ઠેર ઠેર ખડકે છે. જુદી જુદી ટુકડીમાં નિકળતા માલિક વગરના ઢોર વાપીમાં શિરોવેદના બની ગયેલ છે તેથી માંગ ઉઠી છે કે રખડતા ઢોરોની સમસ્યાનો અંત આવે.
