દમણ-દીવ બેઠક માટે લાલુભાઈ પટેલના નામની ઘોષણા થતાં ઠેર-ઠેર આનંદ, ઉત્સાહ અને ઉમંગનો માહોલઃ લોકો સ્વયંભૂ ફટાકડા ફોડી, મીઠાઈ વહેંચી લાલુભાઈ પટેલની પસંદગીનું કરી રહેલા સ્વાગત
(વર્તમાન પ્રવાહ ન્યુઝ નેટવર્ક)
દમણ, તા.03: ભારતીય જનતા પાર્ટી દ્વારા આગામી લોકસભા ચૂંટણી માટે 19પ ઉમેદવારોના નામ સાથેની જાહેર કરેલી પ્રથમ યાદીમાં પ્રધાનમંત્રીશ્રી નરેન્દ્રભાઈ મોદી અને ગૃહમંત્રી શ્રી અમિતભાઈ શાહ સાથે દમણ-દીવના વર્તમાન સાંસદ શ્રી લાલુભાઈ પટેલનો પણ સમાવેશ કરાતા સમગ્ર પ્રદેશમાં આનંદ, ઉત્સાહ અને ઉમંગની લાગણી ફેલાઈ જવા પામી છે.
પ્રાપ્ત માહિતી પ્રમાણે ગઈકાલે ભાજપના રાષ્ટ્રીય કાર્યાલયમાં મહામંત્રી શ્રી વિનોદ તાવડેએ 19પ ઉમેદવારોને સમાવેશ કરતી ઉમેદવારોની પ્રથમ યાદી જાહેર કરી હતી. દમણ-દીવના લોકોને ભારે કૂતુહલતા હતી તેમાં શ્રી લાલુભાઈ પટેલના નામની ઘોષણા થતાં ઠેર-ઠેર ઉત્સવ જેવું વાતાવરણ સર્જાવા પામ્યું હતું. ફટાકડા ફોડી અને મીઠાઈઓ વહેંચી લોકોએ શ્રી લાલુભાઈ પટેલની ઉમેદવારીને વધાવી હતી.
દમણ-દીવના વર્તમાન સાંસદ અને ચોથી વખત ભાજપના ઉમેદવાર બનીરહેલા શ્રી લાલુભાઈ પટેલનું દમણ-દીવ પ્રદેશ ભાજપ કાર્યાલય ખાતે પ્રદેશ અધ્યક્ષ શ્રી દિપેશભાઈ ટંડેલ અને અન્ય પદાધિકારીઓએ ભારે ઉત્સાહથી સ્વાગત કર્યું હતું.
દમણ-દીવની લોકસભાની ચૂંટણી માટે ભાજપના ઉમેદવાર ઘોષિત થયેલા વર્તમાન સાંસદ શ્રી લાલુભાઈ પટેલે પોતાની પસંદગી કરવા બદલ દેશના યશસ્વી પ્રધાનમંત્રી શ્રી નરેન્દ્રભાઈ મોદી, ગૃહમંત્રી શ્રી અમિતભાઈ શાહ અને રાષ્ટ્રીય અધ્યક્ષ શ્રી જે.પી. નડ્ડાનો દિલથી આભાર પ્રગટ કર્યો હતો. તેમણે દમણ-દીવના લાખો કાર્યકરોના આશીર્વાદથી મળેલી ટિકીટ પ્રદેશના વિકાસ માટે સમર્પિત કરી હતી. તેમણે જણાવ્યું હતું કે, ચોથી ટર્મમાં દમણ અને દીવનો ઔર વધુ ગતિથી વિકાસ થશે અને સમગ્ર વિશ્વમાં દમણ-દીવનો ડંકો વાગશે એવો વિશ્વાસ પ્રગટ કર્યો હતો.
