હોટલવાળાઓએ કેબીનમાં ફસાયેલ ડ્રાઈવરને બચાવી લીધો
(વર્તમાન પ્રવાહ વાપી બ્યુરો)
વાપી, તા.22: વલસાડ હાઈવે અકસ્માત ઝોન બની ગયો છે. નિરંતર અકસ્માતો થતા રહે છે તેવો વધુ એક અકસ્માત ગુરુવારે રાતે સર્જાયો હતો. હાઈવે ગુંદલાવ ઓવરબ્રિજ ઉપર કારને બચાવવા જતા પાઈપો ભરેલી ટ્રક પલટી મારી ગઈ હતી.
સેલવાસ કંપનીમાંથી પાઈપો ભરી અમદાવાદ જઈ રહેલી ટ્રક નં.ડી.એન.09 એમ 9765 ગુંદલાવ હાઈવે ઓવરબ્રિજ ગુરૂવારે રાતે પસાર થતી હતી તેદરમિયાન ગફલત ભરેલ ડ્રાઈવિંગ કરતી કાર ટ્રક સામે આવી ગઈ હતી. કારને બચાવવા જતા ટ્રક પલટી મારી ગઈ હતી. રોડ ઉપર પાઈપો વેરાતા ટ્રાફિક અવર જવર બંધ થઈ હતી. આજુબાજુના હોટલવાળા તુરંત દોડી આવ્યા હતા. ટ્રકની કેબીનમાં ફસાયેલ ઘાયલ ડ્રાઈવરને બહાર કાઢી સારવાર માટે મોકલી આપ્યો હતો. પોલીસે બે ક્રેઈનની મદદથી ટ્રકને સીધી કરી તેમજ અન્ય એક ટ્રકમાં પાઈપો ભરીને રોડ ટ્રાફિક અવરજવર ચાલું કરાવી હતી.
