અબ્રામા વાવ ફળીયામાં રહેતા વૃધ્ધનું મોત : ટેમ્પો ચાલક આગળ દોડી બાદમાં પોલીસ સમક્ષ હાજર થયો હતો
(વર્તમાન પ્રવાહ વાપી બ્યુરો)
વાપી, તા.22: વલસાડ હાઈવે ઉપર છેલ્લા 24 કલાકમાં બે ગંભીર અકસ્માત સર્જાયા હતા. અબ્રામા પાસે રોડ ક્રોસ કરી રહેલ વૃધ્ધ ઉપર ટેમ્પો ફરી વળતા વૃધ્ધનું ઘટના સ્થળે જ કમકમાટીભર્યું મોત નિપજ્યું હતું.
અબ્રામા વાવ ફળીયામાં રહેતા રમેશભાઈ રામાભાઈ વારલી સબંધીને મળીને ઘરે આવી રહ્યા હતા. હાઈવે રોડ ક્રોસ કરી રહ્યા હતા ત્યારે ગીરીરાજ હોટલ સામે ટેમ્પો નં.જીજે 15 યુ 2747ના ચાલકે રોડ પસાર કરી રહેલ રમેશભાઈને અડફેટે લીધા હતા. ગંભીર અકસ્માતમાં વૃધ્ધનું ઘટના સ્થળે મોત નિપજ્યુંહતું. અકસ્માત કરી ટેમ્પો ડ્રાઈવર ટેમ્પો દોડાવી થોડે દૂર રામદેવ ધાબા પાસે ટેમ્પો પાર્ક કર્યો હતો. બાદ ડ્રાઈવર પોલીસ સ્ટેશનમાં હાજર થતા પોલીસે ઘટના સ્થળે પહોંચી લાશને પી.એમ. માટે સિવિલમાં મોકલી આપી હતી. ટેમ્પો ચાલક વિરૂધ્ધ ગુનો નોંધી પોલીસે વધુ તપાસ હાથ ધરી હતી.