સંઘપ્રદેશ દાદરા નગર હવેલી અને દમણ-દીવમાં મતદારોને પ્રભાવિત કરવા માટે વર્ષોથી રહેલું મુખ્ય પરિબળ‘દારૂ-બોકડું અને રોકડું’
દમણ જિલ્લા પોલીસે નિષ્પક્ષ, મુક્ત, ન્યાયી અને ભયમુક્ત ચૂંટણી યોજવા દારૂના વિક્રેતાઓ અને ડિસ્ટિલરીના સંચાલકોને ચૂંટણીના માપદંડો અને જરૂરી નીતિ-નિયમોનું ચુસ્ત પાલન કરવા આપેલી ચિમકી
(વર્તમાન પ્રવાહ ન્યુઝ નેટવર્ક)
દમણ, તા.28 : આગામી લોકસભા ચૂંટણી-2024ના ઉપલક્ષમાં આજે દમણ પોલીસે દમણ જિલ્લાના દારૂના વિક્રેતાઓ અને દારૂના ઉત્પાદકો સાથે દમણના પોલીસ હેડ ક્વાર્ટરમાં એક મહત્ત્વપૂર્ણ જાગૃતિ બેઠક યોજી હતી.
પ્રાપ્ત માહિતી પ્રમાણે સંઘપ્રદેશ દાદરા નગર હવેલી અને દમણ-દીવમાં મતદારોને પ્રભાવિત કરવા માટે દારૂ-બિયરનું મોટાપાયે વિતરણ કરવામાં આવે છે. પ્રદેશની ચૂંટણીમાં આજપર્યંત ‘દારૂ, બોકડું અને રોકડું(નાણું)’ મતદારોને આકર્ષવા માટેનું મહત્ત્વનું પરિબળ રહ્યું છે. લોકસભાની ચૂંટણીમાં વિવિધ ઉમેદવારો અને રાજકીય પક્ષો દ્વારા ખુબ જ મોટાપાયે દારૂ-બિયર અને ચિકન-કબાબની લ્હાણી મતદારોના જૂથોને કરવામાં આવતી હોય છે. જેના સંદર્ભમાં દમણ જિલ્લા પોલીસે આ વખતે નિષ્પક્ષ પારદર્શક અને મુક્ત, ન્યાયી ચૂંટણી યોજવા માટે કમર કસી છે. જેના ઉપલક્ષમાં દારૂના વિક્રેતાઓ અને ડિસ્ટિલરીના સંચાલકોને ચૂંટણી સંબંધિત દરેક નિયમો આચારસંહિતાના માપદંડો અને સંબંધિત કાયદાકીય જોગવાઈઓનું પાલન કરવા દિશા-નિર્દેશ આપવામાં આવ્યા હતા. જો કોઈ આ દિશા-નિર્દેશો અને નીતિ-નિયમોનું ઉલ્લંઘન કરશે તો તેમની સામે કડક કાનૂની કાર્યવાહી કરવાની પણ ચિમકી આપવામાં આવી હતી.
દમણ પોલીસે આગામી લોકસભાની ચૂંટણીમાં વધુમાં વધુ મતદાન કરી અને કરાવી લોકતંત્રના આપર્વમાં હર્ષોલ્લાસથી સામેલ થવા પણ આહ્વાન કર્યું હતું. આ બેઠકમાં દમણ વાઈન શોપ યુનિયનના પદાધિકારીઓ, દારૂના વિક્રેતાઓ અને ડિસ્ટિલરીના સંચાલકો ઉપસ્થિત રહ્યા હતા.
